បណ្តាវត្តអារាមមួយចំនួនធំ នៅក្នុងខេត្តកណ្តាល បានរៀបចំ​សម្អាត​បរិវេណ​វត្ត​ធ្វើ​កម្ម​វិធី​សង្ក្រាន្ត​នៅ​ក្នុង​វត្ត ហើយរួចរាល់ ដើម្បីទទួលប្រជាពុទ្ធបរិស័ទមកធ្វើបុណ្យដាក់ទានផង និងបង្ក​លក្ខណៈ​សប្បាយ​រីករាយ​ជូនបណ្តាប្រជាពលរដ្ឋ យុវជន យុវនារី ទេសចរជាតិ អន្តរជាតិ ចូលមកទស្សនា រាំ លេងល្បែងកម្សាន្តប្រជាប្រីយ៍នានា អបអរសាទរ ពិធីបុណ្យចូលឆ្នាំថ្មី ប្រពៃណីខ្មែរ។

បើតាមព្រះសង្ឃ និងតាអាចារ្យ នៃវត្តអង្គរជ័យ នៅស្រុកកៀនស្វាយ ខេត្តកណ្តាល មានថេរដីកា នៅ​ថ្ងៃ​ទី១២ ខែមេសានេះថា មកដល់ព្រឹកថ្ងៃនេះ វត្តអង្គរជ័យ រៀបចំទីតាំងពូនភ្នំខ្សាច់ ទីតាំង​បង្សុកូល រៀបចំទីតាំងប្រារព្ធកម្មវិធីសង្ក្រាន្តវត្ត ទីតាំងលេងល្បែងកម្សាន្ត និងសួនផ្កា សួនទឹក​អស់​ហើយ ហើយរងចាំថ្ងៃបុណ្យចូលឆ្នាំថ្មី ប្រពៃណីខ្មែរ ឆ្នាំរោង ឈានចូលមកដល់នៅថ្ងៃស្អែក និង​អំពាវ​នាវ​ដល់​ពុទ្ធបរិស័ទ និងយុវជន យុវនារី ក្នុងភ្ញៀវទេសចរ​ជាតិ​-អន្តរជាតិ ចូល​មក​ទស្សនា​កម្សាន្ត​ឲ្យ​បាន​ច្រើន​កុះករ ដើម្បីញ៉ាំងឲ្យកម្មវិធីសង្ក្រាន្តតាមវត្តមានភាពសប្បាយរីករាយ និង​រក្សា​បាន​នូវ​ការ​គាំទ្រ និងការអភិរក្សវប្បធម៌ខ្មែរឲ្យរីកចម្រើន។

បើតាមក្រុមអាជីវករ និងទេសចរជាតិ ថ្លែងថា នៅក្នុងឆ្នាំនេះ គ្រប់​វត្ត​អារាម​ទាំង​អស់​សុទ្ធ​តែ​រៀបចំ​កម្ម​វិធី​បុណ្យ​ចូល​ឆ្នាំថ្មី ដើម្បីទទួលពុទ្ធបរិស័ទធ្វើបុណ្យ បង្សកូលផង និងការបង្កើត​កម្ម​វិធី​លេង​ល្បែង​កម្សាន្ត​ លើកតម្កើងតម្លៃវប្បធម៌ខ្មែរផង ហើយការដើរកម្សាន្តក្នុងពិធីបុណ្យចូលឆ្នាំថ្មី ប្រពៃណី​ខ្មែរ​ឆ្នាំនេះ គឺគេនាំគ្នាទៅលេងកម្សាន្តវត្តអង្គរជ័យ និងបណ្តាវត្ត​នានា​ទៀត​ដែល​មាន​រៀប​ចំ​កម្ម​វិធី​សង្ក្រាន្ត​ធំៗ។

ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរ ឆ្នាំរោង ព.ស ២៥៦៧ គ.ស២០២៤ ដែល​នឹង​ព្រឹត្ត​ទៅ​ចាប់​ពី​ថ្ងៃ​ទី​១៣ ដល់ថ្ងៃទី១៦ ខែមេសានេះ ក្រសួងធម្មការ និងសាសនា បានណែនាំមន្ទីរ​ធម្មការ ​និងសាសនារាជធានី ខេត្តទាំងអស់ សហការជាមួយមន្ត្រីសង្ឃ ព្រះអធិការតាមវត្តអារ៉ាម រៀប​ចំ​តុបតែង សម្អាតវត្តចងទង់ជាតិ ទង់សាសនា រៀបចំពិធីបុណ្យសាសនា ស្របតាម​ប្រពៃណី​សាសនា ប្រពៃណីជាតិ ដូចជា ពិធីពូនភ្នំខ្សាច់ ស្រង់ព្រះពុទ្ធរូប ពិធីស្រោចស្រពសគន្ធវារី រៀបចំ​ពិធី​បង្សុកូល និងរៀបចំលេងល្បែងប្រជាប្រិយ ក្នុងវត្តអារាមដូចជា ចោលឈូង បោះអង្គុញ ទាញ​ព្រ័ត្រ លាក់កន្សែង ដណ្តើមស្លឹកឈើ និងការច្រៀង រាំវង់ រាំក្បាច់សារ៉ាវ៉ាន់ ឡាំលាវ ឆៃយ៉ាំជាដើម និ​ង​ហាមលេងប៉ាតម្សៅ ធ្យូង បាញ់ទឹក ល្បែងស៊ីសង និងគ្រឿងផ្ទុះនានា៕ អត្ថបទ៖ ស៊ុម សុខជា