អាជ្ញាធរខេត្តសៀមរាប នៅព្រឹកថ្ងៃទី១២ ខែមេសា ឆ្នាំ២០២៤នេះ បានរៀបចំពិធី​ក្រុង​ពាលីបួង​សួង​សុំ​សេចក្ដីសុខចម្រើន បើកដំណើរការព្រឹត្ដិការណ៍ សៀមរាបសង្ក្រាន្ដ ដើម្បីអបអរ​ពិធី​បុណ្យ​ចូលឆ្នាំ​ប្រពៃណីជាតិខ្មែរ ដែលនឹងចាប់ផ្ដើមនៅថ្ងៃទី១៣ខែមេសាឆ្នាំ២០២៤ ស្ថិតនៅសួនច្បារ​ព្រះរាជ​ដំណាក់​ក្រុងសៀមរាប។

ពិធីបួងសួងសុំនូវសេចក្តីសុខដ៏មានសារៈសំខាន់នេះនេះ បានរៀបចំធ្វើឡើង តាម​ទំនៀម​ទម្លាប់​ប្រពៃណី​ជាតិ​ខ្មែរ នៅមុនថ្ងៃចូលឆ្នាំថ្មីមកដល់ ដែលធ្វើនៅសួនច្បារព្រះរាជដំណាក់ខេត្តសៀមរាប ដើម្បី​ផ្ដល់ក្ដីសុខដល់ប្រជាពលរដ្ឋ ភ្ញៀវទេសចរជាតិនិងអន្ដរជាតិ ក្រោមវត្តមានរបស់ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ប្រាក់ សោភ័ណ អភិបាល​ខេត្តសៀមរាប។ ព្រម​ទាំង​ឯកឧត្តម លោកជំទាវ សមាជិកក្រុមប្រឹក្សាខេត្ត អស់លោក លោកស្រីជាអាជ្ញាធរជាតិអប្សរា ថ្នាក់​ដឹកនាំមន្ទីរ អង្គភាព អាជ្ញាធរក្រុង ស្រុក  និង មន្ត្រីរាជការ ប្រជាពលរដ្ឋផងដែរ ។ កម្ម​វិធី​បួង​សួង បានសូត្រធម៌ ឱ្យបារមីវត្ថុស័ក្តិសិទ្ធិទាំងឡាយផ្ដល់សេចក្តីសុខ នៃកិច្ច​ដំណើរ​ការ​ព្រឹត្តិការណ៍​សៀមរាប​សង្ក្រាន្តឆ្នាំ២០២៤ ឲ្យប្រកបដោយជោគជ័យ សេរីមង្គលដ៏បវរ ប្រកបតាមសេចក្តី​ប៉ង​ប្រាថ្នា ​នៃប្រជាពលរដ្ឋខ្មែរ ព្រមទាំងភ្ញៀវជាតិ-អន្តរជាតិ ដែលបានទៅ​កម្សាន្ដ​នូវ​ព្រឹត្ដិការណ៍​បុណ្យ​ចូល​ឆ្នាំ​ថ្មី​ប្រពៃណីជាតិខ្មែរនាពេលនេះ ។តាមរយៈនៃការប្រារព្ធពិធីបួងសួងនេះផងដែរ គឺបាន​បង្ហាញ អំពីវប្បធម៌ ប្រពៃណីរស់នៅរបស់ប្រជាជនខ្មែរ មានជំនឿថា មានព្រលឹងបុព្វបុរសខ្មែរ នៅ​តាម​ថែ​រក្សាកូនចៅជំនាន់ក្រោយៗ ជាពិសេសពិធីបុណ្យចូលឆ្នាំថ្មីនេះ។

សូមបញ្ជាក់ថា គោលបំណងនៃការរៀបចំព្រឹត្តិការណ៍សៀមរាបសង្ក្រាន្ដនេះ ជាការផ្តល់​នូវ​ឱកាស​ដល់​យុវជន និង សាធារណជនខ្មែរទូទៅ ឲ្យបានចូលរួមក្នុង ការអបអរសាទរ ពិធីបុណ្យ​ចូល​ឆ្នាំថ្មី​ប្រពៃណី​ជាតិ នៅលើទឹកដីប្រវត្តិសាស្ត្រអង្គរ ជាលក្ខណៈមហាគ្រួសារខ្មែរតែមួយ ស្ថិតក្រោម​ដំបូល​សន្តិភាព​តែមួយ នៃស្មារតីសុខដុម សប្បាយរីករាយ និង បានសិក្សាស្វែង​យល់​នូវ​ភាព​រុង​រឿង​នៃ​ព្រះរាជាណាចក្រកម្ពុជា នាសម័យមហានគរ ក៏ជាការបំផុសនូវឆន្ទះ មនសិការរបស់​យុវជន​ខ្មែរ​យើង បន្តថែរក្សាមរតកវប្បធម៌ខ្មែរឲ្យបានគង់វង្សតទៅអនាគត ។ ព្រឹត្តិការណ៍​សៀមរាប​សង្រ្កាន្ត ក៏បានផ្តល់ឱកាសឲ្យព្រះរាជាណាចក្រកម្ពុជា បានធ្វើការ​ផ្សព្វ​ផ្សាយ​លើក​តម្កើង ពីអរិយធម៌ វប្បធម៌ ទំនៀមទម្លាប់ និង ប្រពៃណីដ៏ផូរផង់ របស់ ប្រជាពលរដ្ឋខ្មែរយើង ជូន​ដល់ភ្ញៀវទេសចរអន្តរជាតិ បានស្វែងយល់ និង ដើមី្បពង្រីកកិត្យានុភាពនៅក្នុងតំបន់ និងទៅ​លើ​ពិភពលោក៕