កំពង់ឆ្នាំង៖ នៅព្រឹកថ្ងៃទី១២ ខែមេសា ឆ្នាំ២០២៤នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានអោយដឹងថា តំបន់ត្រជាក់នឹងមានមនុស្សប្រមាណជាង១០ម៉ឺននាក់មកកំសាន្តសប្បាយចាប់ពីវត្តយាយទេព មកដល់មុខសាលាខេត្តកំពង់ឆ្នាំង ។ សង្ក្រាន្តឆ្នាំថ្មីប្រពៃណីខ្មែរឆ្នាំនេះ រដ្ឋបាលខេត្តកំពង់ឆ្នាំង បានត្រៀមរួចជាស្រេចនូវល្បែងប្រជាប្រិយប្រពៃណីខ្មែរ និងទីកន្លែងសម្រាប់បងប្អូនប្រជាពលរដ្ឋ និងយុវជនកំសាន្តសប្បាយ។

 ឯកឧត្ត ស៊ុន សុវណ្ណារិទ្ធិ ក្នុងពេលចុះពិនិត្យទីតាំងរៀបចំសង្ក្រាន្ត បានអោយដឹងថា៖ ឆ្នាំនេះ រដ្ឋបាលខេត្ត និងក្រុងកំពង់ឆ្នាំង បានរៀបចំទីតាំងចំនួន៣ ទី១ មុខសាលាខេត្តកំពង់ឆ្នាំង គឺសម្រាប់លេងល្បែងប្រជាប្រិយប្រពៃណីខ្មែរ និងរាំកំសាន្ត ទី២នៅវិមានឯករាជ្យ សម្រាប់ការប្រគុំតន្ត្រីខ្នាតធំ និងទី៣តំបន់ត្រជាក់ មានការរាំកំសាន្ត និងងូតទឹកត្រជាក់ធ្លាក់ពីលើមក ដែលក្នុងតំបន់ត្រជាក់តែមួយ អាចទទួលភ្ញៀវទេសចរ និងបងប្អូនប្រជាពលរដ្ឋប្រមាណជាង១០ម៉ឺននាក់។ ដោយឡែកស្នងការនគរបាលខេត្ត កងរាជអាវុធហត្ថ រួមនិងប្រជាការពារប្រមាណជាង១ពាន់នាក់ ត្រូវបានដាក់ពង្រាយនៅតាមវត្តអារាម ទីរមណីយដ្ឋាន កន្លែងប្រារព្វសង្ក្រាន្ត និងរក្សាសុខសវត្ថិភាពតាមដងផ្លូវផងដែរ។ 

ឯកឧត្តម ស៊ុន សុណ្ណារិទ្ធិ អភិបាលខេត្តកំពអ់ឆ្នាំងបានអំពាវនាវ និងអញ្ជើញប្រជាពលរដ្ឋខ្មែរ លោកយាយលោកតា ពុកម៉ែ មាមីង បងប្អូន យុវជនយុវតី កុមារាកុមារី និងមិត្តភក្តិបរទេសជិតឆ្ងាយ ចូលរួមកម្សាន្តសប្បាយនៅសង្ក្រាន្តខេត្តកំពង់ឆ្នាំងទាំង៤ថ្ងៃ ឱ្យបានច្រើនកុះករ និងអធឹកអធម ក្រោមម្លប់សន្តិភាពដ៏ត្រជាក់ត្រជុំនេះ ហើយឯកឧត្តមបានសំណូមពរដល់បងប្អូនអ្នកប្រើប្រាស់ផ្លូវទាំងអស់ មេត្តានាំគ្នាប្រុងប្រយ័ត្ន កុំវ៉ាជែងហួសល្បឿន កុំបើកបរក្នុងស្ថានភាពស្រវឹង ត្រូវប្រកាន់ស្តាំជាប់ជានិច្ច ធ្វើម៉េចកុំអោយមានគ្រោះថ្នាក់ចរាចរណ៍ ៕ ដោយ ៖ កាំង ហុងវាស្នា