លោក អូជេ ស៊ីមសុន (OJ Simpson) ដែលជាកីឡាករបាល់អោប (បាល់ទាត់របស់អាមេរិក) លីគប្រកួតបាល់អោបជាតិ (NFL) និងដែលត្រូវបានលើកលែងទោសពីបទឃាតកម្មលើអតីតភរិយា និងមិត្តម្នាក់របស់នាង បានទទួលមរណភាពនៅវ័យ ៧៦ ឆ្នាំ បន្ទាប់ពីការតស៊ូជាមួយជំងឺមហារីកក្រពេញប្រូស្តាតអស់រយៈពេលយ៉ាងយូរ នេះបើយោងគ្រួសាររបស់លោកបានប្រកាសកាលពីថ្ងៃព្រហស្បតិ៍ (១១ មេសា)។

លោកមានឈ្មោះពេញថា អូរិនថល ជេមស៍ ស៊ីមសុន (Orenthal James Simpson) ទទួលបានភាពល្បីល្បាញជាកីឡាករបាល់អោបនៅមហាវិទ្យាល័យ មុនពេលចូលរួមការប្រកួតបាល់អោបជាតិ ដែលលោកបានឈ្នះពានរង្វាន់កីឡាករឆ្នើមបំផុតនៅឆ្នាំ១៩៧៣។ ប៉ុន្តែកេរ្តិ៍ឈ្មោះនេះបានប្រែក្លាយទៅជាភាពអាសោច បន្ទាប់ពីលោកត្រូវបានចោទប្រកាន់ក្នុងបណ្ដឹងសម្លាប់យ៉ាងព្រៃផ្សៃលើអតីតភរិយាខ្លួន លោកស្រី នីខូល ប្រោន ស៊ីមសុន (Nicole Brown Simpson) និងមិត្តភ័ក្តិរបស់នាងឈ្មោះ រ៉ន ហ្គូលមែន (Ron Goldman) ក្នុងឆ្នាំ១៩៩៤។

ដោយមានរហស្សនាមថា «ទឹកក្រូច» ព្រោះអក្សរអង់គ្លេស OJ ក្នុងឈ្មោះលោកតំណាងឱ្យពាក្យ ទឹកក្រូច (Orange Juice) លោក ស៊ីមសុន គឺជាអត្តពលិកដ៏ល្អបំផុតនិងពេញនិយមបំផុតនៅចុងទសវត្សរ៍ឆ្នាំ១៩៦០ និង១៩៧០។ ក្នុងឆ្នាំ១៩៩៥ លោកត្រូវបានកាត់ទោសដ៏ចម្រូងចម្រាសដោយគណៈវិនិច្ឆ័យទីក្រុង ឡូសអែនជើលេស (Los Angeles) នៅក្នុងអ្វីដែលត្រូវបានគេហៅថា «ការកាត់ក្តីប្រចាំសតវត្សរ៍»។ ទស្សនៈសាធារណៈអំពីថាតើលោកមានទោស ឬមិនមានទោស ត្រូវបានបែងចែកយ៉ាងខ្លាំងតាមបន្ទាត់ពូជសាសន៍។

ក្រោយមកលោក ស៊ីមសុន បានជាប់ពន្ធនាគាររយៈពេលប្រាំបួនឆ្នាំនៅក្នុងពន្ធនាគាររដ្ឋ ណេវ៉ាដា (Nevada) បន្ទាប់ពីត្រូវបានកាត់ទោសក្នុងឆ្នាំ២០០៨ ពីបទប្លន់ប្រដាប់អាវុធចំនួន ១២ ករណីនិងចាប់ជំរិតអ្នកលក់វត្ថុអនុស្សាវរីយ៍កីឡាពីរនាក់នៅឯសណ្ឋាគារ ឡាស វេហ្គាស (Las Vegas)៕