នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បាននិយាយថា ប្រទេសឥណ្ឌា និងចិនត្រូវតែដោះស្រាយជម្លោះព្រំដែនរបស់ពួកគេជាបន្ទាន់ ដើម្បីកែលម្អទំនាក់ទំនងទ្វេភាគី។

ប្រទេសទាំងពីរ មានព្រំប្រទល់វែង ៣.៤៤០គីឡូម៉ែត្រ (២.១០០ម៉ាយ) នៅក្នុងតំបន់ភ្នំហិម៉ាឡៃដែលជាប្រភពនៃភាពតានតឹងអស់ជាច្រើនទសវត្សរ៍មកហើយ។

លោកម៉ូឌី បានធ្វើការអត្ថាធិប្បាយក្នុងអំឡុងកិច្ចសម្ភាសន៍ដ៏កម្រមួយជាមួយទស្សនាវដ្តី Newsweek។

ជារឿយៗ ក្រុមគណបក្សប្រឆាំង បានចោទប្រកាន់លោកថា រក្សាភាពស្ងៀមស្ងាត់ចំពោះការលុកលុយរបស់ចិនតាមព្រំដែន។

ក្នុងការកាន់តំណែងជិត ១០ឆ្នាំរបស់ខ្លួន លោកម៉ូឌី បានផ្តល់បទសម្ភាសន៍តិចតួចដល់សារព័ត៌មាន ហើយមិនដែលបានថ្លែងសុន្ទរកថាក្នុងសន្និសីទសារព័ត៌មានណាមួយ នៅក្នុងប្រទេសឥណ្ឌាទេ។

ប៉ុន្តែរយៈពេលប៉ុន្មានថ្ងៃមុនការបោះឆ្នោត ចាប់ផ្តើមនៅក្នុងការបោះឆ្នោតទូទៅរបស់ប្រទេសឥណ្ឌា លោកនាយករដ្ឋមន្ត្រី បានផ្តល់បទសម្ភាសន៍ដល់សារព័ត៌មានចំនួនបី គឺទូរទស្សន៍ Thanthi TV និង Assam Tribune ក្នុងប្រទេសឥណ្ឌា និងទស្សនាវដ្តីអាមេរិក Newsweek។

នៅក្នុងបទសម្ភាសន៍ចុងក្រោយនេះ លោកម៉ូឌី មិនបានធ្វើអត្ថាធិប្បាយដោយផ្ទាល់លើការចោទប្រកាន់របស់ក្រុមគណបក្សប្រឆាំងដែលថា ចិនបានកាន់កាប់ផ្នែកជាច្រើននៃទឹកដីឥណ្ឌានោះទេ។ ជំនួសមកវិញ លោកបាននិយាយអំពីសារៈសំខាន់នៃទំនាក់ទំនងរបស់ឥណ្ឌាជាមួយចិន។