អ្នកជាតិនិយមរុស្ស៊ីដែលកំពុងជាប់ពន្ធនាគារ ដែលដើរតួនាំមុខគេក្នុងបាញ់ទម្លាក់យន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ចង់ចូលរួមក្នុងជួរមុខ នៅអ៊ុយក្រែន។

ភរិយារបស់លោក Igor 'Strelkov' Girkin ដែលជាអតីតមន្រ្តីនៅក្នុងសេវាសន្តិសុខសហព័ន្ធ ( FSB) របស់រុស្ស៊ីដែលបានជួយដាក់តំបន់គ្រីម៉េជាឧបសម្ព័ន្ធដោយខុសច្បាប់ បាននិយាយថា ប្តីរបស់ខ្លួន កំពុងសង្ឃឹមថា នឹងជម្រះបញ្ជីឧក្រិដ្ឋកម្មរបស់គាត់ ដោយការប្រយុទ្ធគ្នា នៅអ៊ុយក្រែនភាគខាងកើត។

អតីតមេទ័ពអាយុ ៥៤ឆ្នាំ ដែលបានប្រែក្លាយអ្នកសរសេរប្លុកយោធា ត្រូវបានកាត់ទោសឲ្យពន្ធនាគាររយៈពេល ៤ឆ្នាំក្នុងខែមករា ពីបទ«ញុះញង់ឲ្យមានភាពជ្រុលនិយម» បន្ទាប់ពីបានរិះគន់ការដោះស្រាយសង្គ្រាមរបស់លោកប្រធានាធិបតី វ្ល៉ាឌីមៀ ពូទីន ( Vladimir Putin) ប្រឆាំងនឹងអ៊ុយ ក្រែន។

នៅក្រោមច្បាប់ជ្រើសរើសថ្មីដែលចុះហត្ថលេខាដោយប្រធានាធិបតីរុស្ស៊ីកាលពីខែមុន បុគ្គលដែលត្រូវបានកាត់ទោសពីបទ «ជ្រុលនិយម» និងឧក្រិដ្ឋកម្មធ្ងន់ធ្ងរផ្សេងទៀត ត្រូវបានរារាំងមិនឲ្យចូលបម្រើយោធា។

ភរិយារបស់លោកឈ្មោះ Miroslava Reginskaya បាននិយាយថា អង្គភាពមួយនៅក្នុងសាធារណរដ្ឋប្រជាមានិតដូណិតស្ក៍ ( Donetsk) មានបំណងចង់ឲ្យគាត់ធ្វើជាមេបញ្ជាការកងអនុសេនាតូច។

អ្នកស្រីបាននិយាយថា៖«នៅពេលដែលប្រទេសមួយ កំពុងឆ្លងកាត់ជម្លោះយោធាធ្ងន់ធ្ងរ វាគឺជាឧក្រិដ្ឋកម្មដែលមិនអនុញ្ញាតឲ្យមន្រ្តីនិងអ្នកស្នេហាជាតិ ដែលមានបទពិសោធ និងចំណេះដឹងពិសេសក្នុងវិស័យយោធា ទៅកាន់ជួរមុខ»។