ទូរទស្សន៍រដ្ឋ KRT នៅថ្ងៃសុក្រ (១២ មេសា) បានរាយការណ៍ថា សមាជិកសភាជាន់ខ្ពស់ និងជាមន្ត្រីជាន់ខ្ពស់បំផុតលំដាប់ទី៣ របស់បក្សកុម្មុយនីស្តចិន លោក Zhao Leji បានជួបពិភាក្សាជាមួយសមភាគីកូរ៉េខាងជើង នៅទីក្រុងព្យុងយ៉ាង។

យោងតាមទូរទស្សន៍ KRT បានឲ្យដឹងថា លោក Zhao បានធ្វើដំណើរទៅដល់ទីក្រុងព្យុងយ៉ាង កាលពីថ្ងៃព្រហស្បតិ៍ (១១ មេសា) ហើយបានជួបជាមួយលោក Choe Ryong Hae ដើម្បីពិភាក្សាអំពីវិធីដែលប្រទេសទាំង២ អាចជំរុញដល់ការផ្លាស់ប្តូរ និងកិច្ចសហប្រតិបត្តិការលើគ្រប់វិស័យ។

គួរបញ្ជាក់ថា ដំណើរទស្សនកិច្ចសុច្ឆន្ទៈផ្លូវការរបស់លោក Zhao ធ្វើឡើងនៅពេលដែលទីក្រុងព្យុងយ៉ាងព្យាយាមពង្រីកការផ្លាស់ប្តូរការទូតជាមួយសម្ព័ន្ធមិត្តនយោបាយដ៏សំខាន់របស់ខ្លួន បន្ទាប់ពីបានលុបចោលការរឹតបន្តឹងទប់ស្កាត់ជំងឺកូវីដ-១៩។

ប្រធានាធិបតីចិនលោក Xi Jinping និងមេដឹកនាំកូរ៉េខាងជើងលោក Kim Jong Un បានប្រកាសថា ឆ្នាំ២០២៤ ជា «ឆ្នាំនៃមិត្តភាព» ដោយអំពាវនាវឲ្យមានសកម្មភាពជាបន្តបន្ទាប់ ដើម្បីប្រារព្ធខួបលើកទី៧៥ នៃទំនាក់ទំនងការទូតរបស់ប្រទេសទាំង២៕