ដោយយោងទៅលើកិច្ចព្រមព្រៀងរវាងរបបសឹកនិងប្រធានាធិបតីរុស្ស៊ីវ៉្លាឌីមៀ ពូទីន ក្នុងការពង្រឹងកិច្ចសហប្រតិបត្ដិកាគ្នា ទូរទស្សន៍រដ្ឋនីហ្សេRTN បាននិយាយ កាលពីថ្ងៃព្រហស្បតិ៍ថា គ្រូបង្វឹកយោធារុស្ស៊ី បានទៅដល់ប្រទេសនីហ្សេកាលពីថ្ងៃពុធ តាមយន្ដហោះ១គ្រឿង ដែលមានដឹកឧបរណ៍យោធាមកជាមួយទៀតផង។

ទូរទស្សន៍បានបង្ហាញវីដេអូយន្ដហោះដឹកជញ្ជូនយោធា១គ្រឿង កំពុងរើឥវ៉ាន់ចេញ ខណ:ដែលមនុស្សមួយចំនួនដែលហត់នឿយឈរជិតនោះ និងបាននិយាយថា រុស្ស៊ីបានយល់ព្រមតម្លើងប្រព័ន្ធប្រឆាំងអាកាសយានក្នុងប្រទេសនីហ្សេ។

តាំងពីរដ្ឋប្រហាក្នុងខែកក្កដាឆ្នាំ២០២៣មក របបយោធាដែលកាន់កាប់អំណាចក្នុងរដ្ឋធានីញ៉ាម៉េ (Niamey) បានចាប់ផ្ដើមបណ្ដេញកងទ័ពបារាំងនិងអឺរ៉ុបចេញ និងបានចាកចេញពីសហគមន៍សេដ្ឋកិច្ចរបស់ប្លុកតំបន់រដ្ឋអាហ្រ្វិកខាងលិចទៀតផង។ ដូចគ្នានឹងរបបសឹកនេះដែរ ប្រទេសជិតខាងម៉ាលី និងបួគីណា ហ្វាសូ ក៍បានពង្រឹងចំណងទាក់ទងយោធាជាមួយរុស្ស៊ីផងដែរ។

មន្រ្ដីការពារជាតិរុស្ស៊ីថ្នាក់ខ្ពស់ៗក្នុងនោះរួមមានលោក យូនើស បេក យេវកូរ៉ូវ (Yunus-bek Yevkurov) ដែលជាអនុរដ្ឋមន្រ្ដីការពារជាតិរុស្ស៊ី ក៏បានអញ្ជើញធ្វើទស្សនកិច្ចទៅកាន់ប្រទេសនេះនិងបានជួបជាមួយមេដឹកនាំរបបសឹកកាលពីប៉ុន្មានខែថ្មីៗនេះផងដែរ។