បណ្ដាមន្ត្រីអាមេរិក កាលពីថ្ងៃសុក្រ (១២ មេសា) បាននិយាយថា ប្រទេសចិនកំពុងជួយរុស្ស៊ីពង្រីកយោធាដ៏ធំបំផុតរបស់ខ្លួន ចាប់តាំងពីសម័យសូវៀតមក ដោយបង្កើនសម្ពាធសាធារណៈ ខណៈដែលការព្រួយបារម្ភកើនឡើង ចំពោះអ៊ុយក្រែន។

មន្ត្រីអាមេរិកទាំងនោះសង្ឃឹមថា ការបញ្ចេញពត៌មានស៊ើបការណ៍សម្ងាត់នឹងជួយជំរុញឲ្យសម្ព័ន្ធមិត្តអឺរ៉ុបដាក់សម្ពាធលើប្រទេសចិន ខណៈដែលអធិការបតីអាល្លឺម៉ង់ លោក Olaf Scholz ធ្វើដំណើរទៅកាន់ទីក្រុងប៉េកាំង នៅចុងសប្តាហ៍នេះ ហើយរដ្ឋមន្ត្រីការបរទេសនៃក្រុមប្រទេសទាំង៧ (G7) នឹងជួបប្រជុំគ្នា នាសប្តាហ៍ក្រោយ នៅក្នុងប្រទេសអ៊ីតាលី។

ដោយបង្ហាញពីការរកឃើញរបស់សហរដ្ឋអាមេរិក ក្រុមមន្ត្រីទាំងនោះបានលើកឡើងថា ចិនកំពុងជួយរុស្ស៊ីលើវិស័យជាច្រើន ក្នុងនោះរួមទាំងការផលិតយានដ្រូនរួមគ្នា សមត្ថភាពបង្កើតមូលដ្ឋានលំហអាកាស និងការនាំចេញឧបករណ៍ម៉ាស៊ីនដ៏សំខាន់ សម្រាប់ការផលិតមីស៊ីលបាលីស្ទិក។

មន្ត្រីជាន់ខ្ពស់អាមេរិកម្នាក់ បានប្រាប់អ្នកសារព័ត៌មានក្នុងលក្ខខណ្ឌមិនបញ្ចេញឈ្មោះថា ចាប់តាំងពីមានការលុកលុយរបស់រុស្ស៊ីលើអ៊ុយក្រែន ប្រទេសចិនគឺជាកត្តាជំរុញសំខាន់ក្នុងការស្តារឡើងវិញនូវមូលដ្ឋានឧស្សាហកម្មការពារជាតិរបស់រុស្ស៊ី «ដែលប្រសិនបើមិនដូច្នេះ បានជួបនឹងបញ្ហាធ្ងន់ធ្ងរជាមិនខាន»។ មន្ត្រីរូបនោះបាននិយាយថា៖ «រុស្ស៊ីកំពុងអនុវត្តការពង្រីកផ្នែកការពារជាតិដ៏ធំបំផុតរបស់ខ្លួន ចាប់តាំងពីសម័យសូវៀត និងប្រើពេលលឿនជាងដែលយើងជឿថា អាចធ្វើទៅបាន អំឡុងពេលជម្លោះចាប់ផ្ដើមដំបូង»។

ជាមួយគ្នានេះ បណ្ដាមន្ត្រីអាមេរិកទាំងនោះបានបន្ថែមទៀតថា ចិនបានផ្តល់ជាង ៧០ភាគរយនៃទឹកប្រាក់ចំនួន ៩០០លានដុល្លារ ក្នុងឧបករណ៍ម៉ាស៊ីន ដែលទំនងជាត្រូវបានប្រើប្រាស់ដើម្បីផលិតមីស៊ីលបាលីស្ទិក ដែលត្រូវបាននាំចូលដោយប្រទេសរុស្ស៊ី ក្នុងត្រីមាសចុងក្រោយនៃឆ្នាំ២០២៣។ ហើយលើសពីនោះទៀត មន្ត្រីអាមេរិកក៏បាននិយាយផងដែរថា ៩០ភាគរយនៃការនាំចូលមីក្រូអេឡិចត្រូនិចរបស់រុស្ស៊ី ដែលប្រើប្រាស់ ដើម្បីផលិតមីស៊ីល រថក្រោះ និងយន្តហោះ បានមកពីប្រទេសចិន កាលពីឆ្នាំមុន៕