នៅថ្ងៃចូលឆ្នាំទី១ ជាថ្ងៃមហាសង្ក្រាន្ត ប្រជាពលរដ្ឋ ជាពុទ្ធបរិស័ទបាននាំយកចង្ហាន់ និង​ទេយ្យទាន​ទៅ​ប្រគេនព្រះសង្ឃនៅតាមបណ្ដាវត្តអារាមនានា ដែលនេះគឺជា​ទំនៀម​ទំលាប់​ប្រពៃណី​ដែល​ត្រូវបានប្រតិបត្តិយ៉ាងខ្ជាប់ខ្ជួនតាំងបុរាណកាលមកទល់បច្ចុប្បន្ន។

សម្រាប់ថ្ងៃមហាសង្ក្រាន្តនេះ នៅវត្តគល់ទទឹង ក្នុងខណ្ឌច្បារអំពៅ រាជធានីភ្នំពេញ ក៏មានវត្តមាន ប្រជា​ពលរដ្ឋពុទ្ធបរិស័ទជាច្រើនបាននាំយកចង្ហាន់ និងទេយ្យវត្ថុទៅប្រគេនព្រះសង្ឃផងដែរ។ ភាគ​ច្រើន ពលរដ្ឋបានអញ្ជើញទៅធ្វើបុណ្យនារដូវលកាលចូលឆ្នាំនេះជាលក្ខណៈគ្រួសារ ដោយ​ម្នាក់​ៗ​បង្ហាញ​នូវទឹកមុខសប្បាយរីករាយ។ ក្រោយចេញពីវត្តអារាម ក្រុមគ្រួសារ​មួយ​ចំនួន​ក៏​មាន​គម្រោង​ដើរ​កម្សាន្តតាមទីរម្មណីយដ្ឋាននានា ជាពិសេសទៅគោលដៅវត្តភ្នំ ដែលរៀបចំ​កម្ម​វិធី​សង្ក្រាន្ត​ សម្រាប់អ្នករស់នៅរាជធានីភ្នំពេញ។

ក្នុង​ឱកាសយកចង្ហាន់ និងទេយ្យទានទៅវត្តធ្វើបុណ្យនេះ ប្រជាពរដ្ឋ​មាន​ទឹក​មុខ​សប្បាយ​រីករាយ​នា​ឱកាស​ពិធីបុណ្យចូលឆ្នាំប្រពៃណីជាតិខ្មែរនាពេលនេះ។ ក្នុងឱកាសនេះ ប្រជាពលរដ្ឋ​ក៏​បាន​បួង​សួង​សុំសេចក្ដីសុខ និងជូនពរ​ដល់​ប្រជាពលរដ្ឋ​គ្រប់​រូប​ទទួល​បាន​សេច​ក្ដី​សុខ​ក្នុង​ឱកាស​ពិធី​បុណ្យ​ចូ​លឆ្នាំប្រពៃណីជាតិផងដែរ។

សូមជម្រាបថា ពិធីបុណ្យ​ចូល​ឆ្នាំ​ប្រពៃណី​ជាតិ​ខ្មែរ​ឆ្នាំ​នេះ​ប្រព្រឹត្តិ​ទៅ​រយៈ​ពេល​៤​ថ្ងៃ​ចាប់​ផ្ដើម​ពី​ថ្ងៃ​ទី​១៣ ដល់១៦ ខែមេសា ឆ្នាំ២០២៤។ ក្នុងឱកាស​នេះ​ប្រជាពលរដ្ឋ​ខ្មែរ​ក្រៅ​ពី​ទៅ​ជួប​ជុំគ្រួ​សារ​សាច់​ញាតិ​ ដើម្បីធ្វើបុណ្យ សន្សំកុសល និងឧទ្ទិសកុសល​ជូន​ដល់​បុព្វការី​ជន​ប្រជាពលរដ្ឋ​ក៏​តែង​តែ​ដើរ​លេងកម្សាន្តទៅតាមតំបន់រម្មណីយដ្ឋាននានានៅក្នុងប្រទេសកម្ពុជាផងដែរ ក្រោយពួក​គេបា​ន​ខិតខំបំពេញការងារអស់រយៈពេល១ឆ្នាំកន្លងផុតទៅ៕  អត្ថបទ៖ គឹមហុក