ប្រជាពលដ្ឋរាប់ពាន់នាក់ បាននាំគ្នាទៅលេងសងង្ក្រាន្តឆ្នាំថ្មី ដែលបានរៀបចំឡើងនៅ ស្រុក​សេសាន ខេត្តស្ទឹងត្រែង ដែលរដ្ឋបាលខេត្តបានរៀបចំ «សេសានសង្ក្រាន្ត» ដើម្បីអបអរសាទរ និង​ផ្ដល់ភាពសប្បាយជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

ក្នុងភូមិសាស្ត្រខេត្តស្ទឹងត្រែង សកម្មភាពនៅតាមលំនៅឋានបងប្អូនប្រជាពលរដ្ឋ និង​តាម​បណ្តា​ក្រុង ស្រុក និងតាមមន្ទីស្ថាប័នរដ្ឋ និងឯកជននានា បានរៀបចំសម្អាត តុបតែងយ៉ាងស្រស់ស្អាត មាន​ភ្លើងពណ៌ ផ្កាភ្ញី ធ្វើសង្ក្រាន្ត ដើម្បីអបអរសាទរទទួលទេវតាឆ្នាំថ្មី ក៏ដូចជា​ទទួល​ភ្ញៀវ​ទេសចរ​ដែល​មក​លេងកម្សាន្តផងដែរ។

លោក សុវណ្ណ ពិសេដ្ឋ អភិបាលស្រុកសេសានបានឲ្យដឹងថា ជារៀងរាល់ឆ្នាំ រដ្ឋបាល​ស្រុក​សេសាន​​បាន​រៀបចំ «សេសានសង្គ្រាន្ត» ដោយធ្វើឡើងរយៈពេល២​ថ្ងៃ​គឺចាប់​ពី​ថ្ងៃ​ទី​១១​ដល់​ថ្ងៃទី​១២ ខែមេសា ឆ្នាំ២០២៤ ដោយមានការអញ្ជើញជាអធិបតី របស់ឯកឧត្តម ឈាង ឡាក់ ប្រធាន​ក្រុម​ប្រឹក្សាខេត្តស្ទឹងត្រែងនិងលោកជំទាវ ,ឯកឧត្តម ស្វាយ សំអ៊ាង អភិបាលខេត្តនិងលោកជំទាវ និង​មាន​ការចូលរួមពីសំណាក់ក្រុមការងារសសយក កងកម្លាំងប្រដាប់អាវុធ អ្នកពាក់ព័ន្ធ និង​ប្រជាពលរដ្ឋ​មក​ពីគ្រប់ទិសទីយ៉ាងច្រើកុះករ។

លោកអភិបាលស្រុកសេសានបានបន្តថាព្រឹត្តិការណ៍សង្ក្រាន គឺជា​ព្រឹត្តិការណ៍​ត្រៀម​សម្រាប់​អបអរ​សាទរ​ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរដែល និងឈាន​ចូល​មក​ដល់​នៅ​ថ្ងៃ​យប់​ថ្ងៃ​ទី១៣ខែមេសា២០២៤នេះ ហើយព្រឹត្តិការសង្ក្រាននេះមិនមែនធ្វើតែក្នុងទឹកដីឃុំកំភុន ស្រុក​សេសាន ខេត្តស្ទឹងត្រែងនោះទេ គឺបានធ្វើនៅទូទាំងខេត្តស្ទឹងត្រែងមាន ២៦ គោលដៅ​ដែល​បាន​រៀបចំ​ព្រឹត្តិការណ៍សង្ក្រាននេះផងដែរ។

ឯកឧត្តម ស្វាយ សំអ៊ាង អភិបាលខេត្តស្ទឹងត្រែងបានមានប្រសាសន៍ថា ព្រឹត្តិការណ៍​សង្ក្រាន្ត​ឆ្នាំ​នេះ ធ្វើឡើងសំដៅក្នុងការរក្សានូវអត្តសញ្ញាណប្រពៃណីទំនៀមទម្លាប់របស់ខ្មែរ និងបង្ហាញ​នូវ​ស្នាដៃ​ក៏​ដូចជាសមិទ្ធផលថ្មីៗដែលរាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ជាពិសេស គឺការអនុវត្ត​នូវ​គោល​នយោបាយ​យុទ្ធ​សាស្ត្រ​បញ្ចកោណ សម្រាប់​រាជ​រដ្ឋាភិបាល​កម្ពុជា បង្ហាញពីសាមគ្គីភាពគ្នាឯកភាពគ្នាជាធ្លុងមួយរបស់ប្រជាពលរដ្ឋខ្មែរ។

ឯកឧត្តមសង្កត់ធ្ងន់ថា រាល់អ្វីដែលបានកើតឡើងនាពេលនេះ ដូចជាការរៀបចំសង្ក្រាន្ត​ ការ​ដាក់​តាំង​ផលិត​ផល​សហគមន៍ ឱ្យភ្ញៀវជាតិអន្តរជាតិបានមើលឃើញ គឺកើតឡើងពីតម្លៃនៃសន្តិភាព ប្រសិន​បើ​ប្រទេសជាតិគ្មានសុខសន្តិភាពអ្វីទាំងអស់គឺមិនអាចរៀបចំឡើងបានឡើយ ដូ​ច​នេះ​យើង​ទាំង​អស់​គ្នាត្រូវ​រួមគ្នា​ការពារ​នូវ​សន្តិភាព​ឲ្យ​នៅ​ស្ថិត​ស្ថរ​គង់​វង់​ទោះ​ជាស្ថិត​នៅ​ក្នុង​តម្លៃ​ណា​ក៏ដោយ៕ អត្ថបទ៖ មាស ផល្លា