តាមការគ្រោងទុក រដ្ឋបាលសាលាខេត្តកណ្តាល នឹងប្រារព្ធពិធីបើកកម្មវិធីសង្ក្រាន្តឆ្នាំថ្មី សម្រាប់​ខេត្ត​កណ្តាល នៅសួនច្បារមាត់ទន្លេក្រុងតាខ្មៅ នាល្ងាចថ្ងៃទី១៣ ខែមេសានេះ ។

លោក កង វណ្ណា អនុប្រធានមន្ទីរវប្បធម៌ និងវិចិត្រសិល្បៈ ខេត្តកណ្តាល បានថ្លែងថា មក​ដល់​ថ្ងៃនេះដែរ គ្រប់ទីតាំងរៀបចំប្រារព្ធកម្មវិធីសង្ក្រាន្តខេត្តកណ្តាល គឺបានរៀបចំ​រួចរាល់​តាម​ការ​គ្រោង​​ទុក នៅសួនមាត់ទន្លេក្រុងតាខ្មៅ ដែលមានដូចជា រូបសំណាកនាគរាជ តំណាងឆ្នាំរោង គោម​ប្រទីពបណ្តែតលើផ្ទៃទឹក គោមហោះពេលយប់ ទីតាំងប្រគំតន្ត្រីស្គរដីបុរាណ ទីតាំងប្រគំ​តន្ត្រី​សម័យ ស្តង់តាំងពិពិរណ៍ ទីតាំងសម្តែងសិល្បៈបុរាណ សម័យ អមនឹងកម្មវិធី ច្រៀងរាំ លេង​ល្បែង​កម្សាន្ត​ជាច្រើន និងសូមអំពាវនាវពលរដ្ឋ ភ្ញៀវទេសចរជាតិអន្តរជាតិ អញ្ជើញចូល​រួម​កម្សាន្ត​សប្បាយ​ទាំង​អស់គ្នា។

មន្ត្រីស្នងការដ្ឋាននគរបាលខេត្តកណ្តាល បានឲ្យដែរថា នៅក្នុងឱកាសនេះដែរ គណៈ​បញ្ជាការ​ខេត្ត បានប្រើប្រាស់កម្លាំងសមត្ថកិច្ចចម្រុះប្រមាណជាង ១០០០ នាក់ ដើម្បីធ្វើការ​ជួយ​សម្រប​សម្រួល​ការពារ​សន្តិសុខ សណ្តាប់ធ្នាប់ សំរួលចរាចរណ៍ធ្វើដំណើរ ទាំងនៅក្នុងបរិវេណ និងក្រៅ​បរិវេណ​ទីតាំង​ប្រារព្ធកម្មវិធីសង្ក្រាន្ត។

តាមកម្មវិធីគ្រោងទុក នៅពេលវេលាម៉ោង៣រសៀលនេះ រដ្ឋបាលខេត្តកណ្តាល នឹងផ្តើម​ធ្វើពិ​ធី​ក្រុង​ពាលី សុំសេចក្តីសុខ សូត្រមន្តលើករាសី សម្តែងសិល្បៈ​បើក​ព្រឹត្តិការណ៍​សង្ក្រាន្ត​ខេត្ត​កណ្តាល ហើយរហូតដល់យប់ម៉ោង៧និង៣០នាទី នឹងធ្វើពិធីបណ្តែតប្រទីព ប្រមាណ​ជិត​១០០០​ប្រទីព ហោះគោម បាញ់កាំជ្រួច លើផ្ទៃទន្លេបាសាក់ អមដោយការទស្សនារាំវង់ តន្ត្រីស្គរដី តន្ត្រីសម័យ និងធ្វើពិធីទទួលទេវតាឆ្នាថ្មី នៅវេលាម៉ោង១០ និង១៧នាទី។

ពាក់ព័ន្ធ​នឹង​ការរៀបចំសង្ក្រាន្តនៅសួនច្បារមាត់ទន្លេបាសាក់ក្រុងតាខ្មៅនេះដែរ បណ្តាពលរដ្ឋ ថ្លែង​ពី​ភាពប្លែកភ្នែកអស្ចារ្យ ចំពោះទិដ្ឋភាពរៀបចំតុបតែងលម្អភ្លើង ឆាកប្រគំតន្ត្រីបុរាណ ឆាក​សម្តែង​សិល្បៈ​បុរាណ សម័យ អមដោយមានលេងល្បែងកម្សាន្តប្រជាប្រីយ៍ ធ្វើឲ្យព្រឹត្តិការណ៍​សង្ក្រាន្ត​ខេត្ត​កណ្តាល មានការរីកចម្រើនជាបន្តបន្ទាប់ពីមួយឆ្នាំទៅមួយឆ្នាំ។

សូមជម្រាបថានៅ ថ្ងៃទី១៤ ខែមេសានេះស្អែកនេះ កម្មវិធីសង្រ្កាន្តខេត្តកណ្តាល នឹង​ប្រព្រឹត្តិ​ទៅ​តាម​កម្ម​វិធី​គ្រោង​ទុក ដូចជាចាប់ពីម៉ោង ៨ ម៉ោងព្រឹក រហូតដល់យប់ នឹងមានរៀបចំកម្ម​វិធី​បញ្ជ្រៀប​ការ​ផ្សព្វផ្សាយបរិស្ថាន អនាម័យស្អាត អប់រំច្បាប់ចរាចរណ៍ អប់រំបញ្ហាគ្រឿងញៀន អម​ដោយ​ការច្រៀងរាំក្នុងតំបន់ត្រជាក់ លេងល្បែងប្រជាប្រិយ រាំវង់ស្គរដី ប្រគំតន្ត្រីបុរាណ សម័យ និងបណ្តែតគោមទឹក ជាដើម៕ អត្ថបទ៖ ស៊ុម សុខជា