សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៅថ្ងៃទី១២ ខែមេសា ឆ្នាំ២០២៤ បាន​អញ្ជើញជាអធិបតីក្នុងពិធីបើកព្រឹត្តិការណ៍សង្រ្កាន្តឆ្នាំថ្មី នៅខេត្ត​បាត់​ដំបង​ដែល​ធ្វើ​ឡើង​នៅបរិវេណ​វិទ្យាល័យនេតយ៉ង់ ស្ថិតក្នុងក្រងបាត់ដំបង។

ក្នុងឱកាសនោះ សម្ដេចក្រឡាហោម ស ខេង សម្ដែងនូវការកោតសរសើរ និងវាយតម្លៃខ្ពស់​ចំពោះ​កិច្ចខិត​ខំ​ប្រឹងប្រែង​របស់​អាជ្ញាធរ​គ្រប់​លំដាប់​ថ្នាក់​ក៏ដូចជាក្រុមការងារយុវជនសហភាពសហព័ន្ធ​យុវជន​កម្ពុជា​ខេត្តបាត់ដំបង ដែលបានយកអស់កម្លាំងកាយកម្លាំងចិត្ត​សហការ​រៀបចំ​ព្រឹត្តិការណ៍​សង្រ្កាន្ត​នេះ​ឡើងដើម្បីជាការចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។

សម្ដេចក្រឡាហោម ស ខេង មានប្រសាសន៍បន្ថែមថា ការរៀបចំព្រឹត្តិការណ៍​សង្រ្កាន្ត​បាត់ដំបង​ឆ្នាំ២០២៤នេះ ពិត​ជាមានសារៈសំខាន់ណាស់​ក្នុង​ការ​បង្កើត​ឱ្យ​មានភាព​សប្បាយរីករាយ​ជូន​ដល់​បង​ប្អូន​ប្រជាពលរដ្ឋ ព្រមទាំងភ្ញៀវជាតិនិងអន្តរជាតិតាមរយៈការផ្សព្វផ្សាយពីវប្បធម៌ ប្រពៃណី ទំនៀម​ទម្លាប់ដ៏ល្អផូរផង់របស់ខ្មែរយើង។

ជាមួយគ្នានេះ សម្ដេចក្រឡាហោម អំពាវនាវដល់អាជ្ញាធរគ្រប់លំដាប់ថ្នាក់ និងសមត្ថកិច្ចពាក់ព័ន្ធ​ទាំង​អស់​ត្រូវសហការគ្នារក្សាឱ្យបាននូវសន្តិសុខ សណ្ដាប់ធ្នាប់ និងសុវត្ថិភាព​ល្អប្រសើរ​ជូន​បង​ប្អូន​ប្រជាពលរដ្ឋ​ក៏​ដូចជាភ្ញៀវជាតិ និងអន្តរជាតិដែលអញ្ជើញ​មក​កម្សាន្ត​ព្រឹត្តិការណ៍​សង្រ្កាន្ត​បាត់ដំបង​២០២៤​ឱ្យបានល្អប្រសើរប្រកបដោយសុវត្ថិភាព​ដោយទប់ស្កាត់ឱ្យបាននូវបាតុភាព​អសកម្ម​ទាំងឡាយ​ដែលនាំឱ្យមានបញ្ហាក្នុងពិធីកម្សាន្តនេះ។

ឯកឧត្តម សុខ លូ អភិបាលខេត្តបាត់ដំបង ថ្លែងឱ្យដឹងថា រដ្ឋបាលខេត្តបាត់ដំបង សហការ​ជាមួយ​សហភាព​សហព័ន្ធ​យុវជ​ន​កម្ពុជា​ខេត្ត​បាត់ដំបង​រៀបចំ​ព្រឹត្តិការណ៍​សង្ក្រាន្ត​បាត់ដំបង​២០២៤​ រយៈពេល៥ថ្ងៃ​ក្នុង​គោល​បំណង​បង្កើ​ត​ការ​សប្បាយ​រីករាយ​ជូន​ដល់​បងប្អូន​ប្រជាពលរដ្ឋ​ក្នុង​ឱកាសពិធីបុណ្យចូលឆ្នាំប្រពៃណីជាតិខ្មែរនាពេលខាងមុខ។ព្រឹត្តិការណ៍សង្ក្រាន្តបាត់ដំបង ២០២៤ ប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៤ នៅតាមបណ្តោយវិថី សម្តេច​ក្រឡាហោម ស ខេង ក្នុងបរិវេណវិទ្យាល័យនេតយ៉ង់ និងបរិវេណខាងមុខសារមន្ទីរ ប្រវត្តិ​សា​ស្ត្រខេត្ត (សាលាខេត្ត) ស្ថិតក្នុងក្រុងបាត់ដំបង ខេត្តបាត់ដំបង៕