​បាល់ទាត់៖ ខ្សែប្រយុទ្ធ​ស្នូល​របស់​ក្រុមព្រះ​ខ័ន​រាជ​ស្វាយរៀង Jean Marie Privat បាន​ឡើង​ឈរ​លំដាប់​កំពូល​តារាង​អ្នក​ស៊ុត​បញ្ចូល​ទី​ច្រើន​ជាង​គេ ​(Top-Scorers) ​បណ្ដោះអាសន្នដោយ​រក​បាន ១០​គ្រាប់​ស្មើ​ខ្សែប្រយុទ្ធ​អាស៊ី​អឺរ៉ុប Abbee Hurbert បន្ទាប់ពី​ជួយ​ក្រុម​យកឈ្នះ​ក្រុម​ម្ចាស់ផ្ទះ​គិរីវង់​សុខ​សែន​ជ័យដោយ​លទ្ធផល ៦-០ ក្នុង​ជំនួប​សប្ដាហ៍​ទី​១០ នៃ​លី​គ​កំពូល​កម្ពុជា នៅ​កីឡដ្ឋាន​គិរីវង់​សុខ​សែន​ជ័យកាលពី​ចុង​សប្ដាហ៍​កន្លងទៅ។​

​ការប្រកួត​នេះ ក្រុម​លោក Conor Nestor បាន​ស៊ុត​បំប៉ោង​សំណាញ់​ទី​ក្រុម​ម្ចាស់ផ្ទះ​គិរីវង់ ២​គ្រាប់​មុននៅ​វគ្គ​ទី​១ ដែល​ធ្វើ​សម្រេច​ដោយ​កីឡាករ Lopez Mendy នៅ​នាទី​២៦ និង​កីឡាករ នី សុខ​រី នៅ​នាទី​២៨។ ចូល​វគ្គ​ទី​២ ព្រះខ័ន​រាជ​ស្វាយរៀងបាន​បន្ថែម ២​គ្រាប់​ទៀតដោយ​កីឡាករ សឿ​យ វិសាល នៅ​នាទី​៥៩ និង​កីឡាករ សារ៉េត គ្រី​យ៉ា នៅ​នាទី​៧៥ និង ២​គ្រាប់​ទៀតធ្វើ​សម្រេច​ដោយ​កីឡាករ Privat នៅ​នាទី​៧៧ និង​នាទី​៨៩។​ ​ជ័យជម្នះ​នេះបានធ្វើ​ឲ្យ​ក្រុមព្រះ​ខ័ន​រាជ​ស្វាយរៀងរំកិល​ទៅ​ឈរ​លេខ​រៀង​ទី​៣ ដោយមាន ១៩​ពិន្ទុ​ស្មើ​ក្រុម​លេខ​២ វិសាខា បន្ទាប់ពី​ឆ្លងកាត់ ៩​ប្រកួត​ដូចគ្នា ឈ្នះ៦ ស្មើ​១ និង​ចាញ់២ ស្របពេល​ក្រុម​គិរីវង់​សុខ​សែន​ជ័យ បាន​បន្ដ​រក្សា​កៅអី​លេខ​៨ និង​មាន ៩​ពិន្ទុ​ក្នុង​ដៃបន្ទាប់ពី​ប្រកួត​បាន ៨​លើក​ឈ្នះ​៣ និង​ចាញ់៥ ។​

​អ្វីដែល​គួរ​ឲ្យ​កត់សម្គាល់ បន្ទាប់ពី​រកបាន ២​គ្រាប់​រួមចំណែក​ជួយ​ក្រុម​ទទួលបាន ៣​ពិន្ទុ​បន្ថែម ខ្សែប្រយុទ្ធ​សញ្ជាតិ​កា​ម៉េ​រូ​ន Privat ក៏បាន​ឡើងឈរ​លំដាប់​កំពូល​តារាង Top-Scorers ដោយ​រកបាន ១០​គ្រាប់​ស្មើគ្នា​ជាមួយ​កីឡាករ Abbee Hurbert គិត​ត្រឹម​សប្ដាហ៍​ទី​១០ នាំមុខ​បេក្ខភាព​គូប្រជែង​ស្បែកជើង​មាស ២​រូប​ទៀតដែល​រកបាន ៩​គ្រាប់​ស្មើគ្នារួមមាន​កីឡាករ Ajayi Opeyemi របស់​វិសាខា និង​កីឡាករ Marcio របស់​ណាហ្គា​វើ​ល​ដ៏៕

​អត្ថបទ៖ លី ឈុន​ឡា