សៀមរាប៖ នាថ្ងៃទី១២ ខែមេសា ឆ្នាំ២០២៤ បងប្អូនប្រជាពលរដ្ឋជាមន្ត្រីរាជការ កងកម្លាំង​ប្រដាប់​អាវុធ កម្មករ កម្មការិនី សិស្ស និស្សិតបានធ្វើដំណើរតាមរថយន្តក្រុង​ដោយ​ឥត​គិត​ថ្លៃ​ទៅលេ​ង​ស្រុកកំណើត ដើម្បីជួបជុំបងប្អូនក្រុមគ្រួសារ ក្ក្នុងឱកាស​បុណ្យចូលឆ្នាំថ្មី​ប្រពៃណី​ជាតិ​ខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤។

ជាមួយគ្នានេះដែរ បងប្អូនបានថ្លែងអំណរគុណយ៉ាងជ្រាលជ្រៅចំពោះសម្តេចបវរធិបតី នាយករដ្ឋមន្ត្រី ដែលបានគិតគូរ​ចំពោះប្រជាពលរដ្ឋដោយអនុញ្ញាត​ឱ្យ​រថយន្ត​របស់​រដ្ឋាករ​ស្វយ័ត​ដឹក​ជញ្ជូន​សាធារណៈរថយន្តក្រុង (City Bus) រាជធានីភ្នំពេញដឹ​កជ​ញ្ជូន​បង​ប្អូន​ប្រជាពលរដ្ឋ​ដោយ​ឥត​គិតថ្លៃ។

សូមបញ្ជាក់ថា នាឱកាសបុណ្យចូលឆ្នាំថ្មីប្រពៃណីខ្មែរនេះ រដ្ឋាករស្វយ័តដឹកជញ្ជូនសាធារណៈ រថយន្ត​ក្រុង (City Bus) រាជធានីភ្នំពេញ បានរៀបចំរថយន្តចំនួន១៣៥គ្រឿង សម្រាប់​បម្រើដ​ល់​ការ​ដឹកជញ្ជូនពីរាជធានីភ្នំពេញ មកខេត្តសៀមរាប និងការដឹកជញ្ជូនពីខេត្តសៀមរាប ទៅ​រាជ​ធានី​ភ្នំពេញ​វិញ តាមពេលវេលា និងទីតាំងចំណតដូចខាងក្រោម៖

១- ចេញដំណើរពីរាជធានីភ្នំពេញមកខេត្តសៀមរាប ទីតាំងចំណតដីឡូតិ៍តំបន់ OCIC ជ្រោយ​ចង្វារ (រង្វង់មូលទេពមច្ឆា) រៀង​រាល់​ម៉ោង​០៦​៖​៣០​នាទី​ព្រឹក​(ចេញជាបន្តបន្ទាប់រហូតអស់រថយន្ត) ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៤ មក​ទីតាំង​ចំណត​មណ្ឌលរដ្ឋបាលមន្ទីរខេត្តសៀមរាប វិថីសម្ដេចវិបុលបញ្ញា សុខ អាន (ផ្លូវ៦០ម៉ែត្រ)។

២- ចេញដំណើរពីខេត្តសៀមរាប ទៅរាជធានីភ្នំពេញតាមពេលវេលា និងទីកន្លែងដូចខាងក្រោម ៖

- នៅថ្ងៃទី១២ ខែមេសា ឆ្នាំ២០២៤ ចេញដំណើរនៅវេលាម៉ោង ១៤ ៖ ០០ នាទី រសៀល

- ចាប់ពីថ្ងៃទី១៣ ដល់ ថ្ងៃទី១៧ ខែមេសា ឆ្នាំ២០២៤ ចេញដំណើររៀងរាល់ម៉ោង៦៖៣០ នាទីព្រឹក (ចេញដំណើរជាបន្តបន្ទាប់រហូតអស់រថយន្ត)

- ចេញដំណើរពីទីតាំងមណ្ឌលរដ្ឋបាលមន្ទីរខេត្តសៀមរាប វិថីសម្ដេចវិបុលបញ្ញា សុខ អាន(ផ្លូវ៦០ម៉ែត្រ) ទៅទីតាំងចំណតដីឡូតិ៍តំបន់ OCIC ជ្រោយចង្វារ (រង្វង់មូលទេពមច្ឆា)។