រដ្ឋបាលខេត្តខេត្តកោះកុង បានរៀបចំតុបតែងលម្អសោភ័ណ្ឌភាពនានារួចជាស្រេចហើយ សម្រាប់​កម្មវិ​ធី​សង្រ្កាន្តឆ្នាំថ្មី ប្រពៃណីជាតិខ្មែរ ដើម្បីបង្កបរិយាកាសសប្បាយរីករាយជូនពលរដ្ឋ ក៏ដូច​ជា​ភ្ញៀវ​ទេសចរ​គ្រប់ទិសទីទាំងអស់ដែលមកទស្សនាកម្សាន្តនៅខេត្តកោះកុង។

ការតុបតែង​លម្អបែបប្រពៃណីខ្មែរជាច្រើនបានលេចរូបរាងមិននៅក្នុងទីរួមខេត្តកោះកុង បណ្តាស្រុក និងវត្តអារាមនានាក្នុងមូលដ្ឋាន សម្រាប់ភាពទាក់ទាញ និងអបអរ​សាទរ​ពិធី​បុណ្យ​ចូល​ឆ្នាំ​ខ្មែរ​ឆ្នាំ២០២៤នេះ។

លោក ស្រេង ហុង អភិបាលរងខេត្តកោះកុង បានឱ្យដឹងនៅថ្ងៃទី១២ ខែមេសា ឆ្នាំ២០២៤ថា ក្រុម​ការងារបានរៀបចំកម្មវិធីសប្បាយជាច្រើន រួមមាន៖ ទីកន្លែងទទួលទេវតាឆ្នាំថ្មី តំបន់​លេង​ល្បែង​ប្រជាប្រិយ ឆាកប្រគុំតន្រ្តី ការតាំងលក់ផលិតផលភូមិ១ឃុំ តំបន់ត្រជាក់ចិត្ត តម្លើងភ្លើង​ពណ៌​តាម​ដងផ្លូវ និងកម្លាំងសមត្ថកិច្ចការពារថែរក្សាសន្តិសុខសណ្តាប់ធ្នាប់។ ចំណែកឯ​តាម​បណ្តា​ស្រុក ឬវត្តអារាមក៏មានការធ្វើបែបនេះដូចគ្នាដែរ។

លោកអភិបាល​រង​ខេត្តកោះកុង ជឿជាក់ថា គ្រប់ពលរដ្ឋ និងភ្ញៀវទេសចរនឹង​អញ្ជើញ​មក​លេង​កម្សា​ន្ត​ឱ្យសប្បាយរីករាយថ្ងៃអំណសង្រ្កាន្តឆ្នាំថ្មី ប្រពៃណីជាតិខ្មែរយើង ក្រោមម្លប់សុខសន្តិភាព និង​ការអភិវឌ្ឍន៍ឥតឈប់ឈរ។ អំឡុងពេលពិធីបុណ្យចូលឆ្នាំថ្មីនេះដែរ អាជ្ញាធរ​សមត្ថកិច្ច​ពាក់​ព័ន្ធ​អំពាវ​នាវដល់ពលរដ្ឋ និងភ្ញៀវទេសចរ ចូលរួមថែរក្សាបរិស្ថានអនាម័យបានឱ្យស្អាតល្អ ដោយ​មិន​ត្រូវ​បោះចោល​សំរាម​តាមទីសាធារណ​ពាស​វាល​ពាល​កាលនោះទេដែលនាំឱ្យ​បាត់​បង់​សោភ័ណ្ឌ​ទីក្រុង ព្រមទាំងតំបន់ទេសចរណ៍៕ អត្តបទ៖ ឈឹម មករា