សៀមរាប៖ ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ នៅថ្ងៃទី១៣ ខែមេសា ឆ្នាំ២០២៤នេះ បានអញ្ជើញជាអធិបតីបើក «ព្រឹត្តិការណ៍សៀមរាបសង្ក្រាន្ត» ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលធ្វើឡើងនៅសួនច្បារព្រះរាជាណាក់ ក្រុងសៀមរាប។ ពិធីបើកសៀមរាបសង្ក្រាន្តនេះ មានការចូលរួមពីមន្ត្រីរាជការ កងកម្លាំងប្រដាប់អាវុធ ក្រុមយុវជន ភ្ញៀវទេសចរណ៍ជាតិនិងអន្តរជាតិប្រមាណ៤០០នាក់។

​ឯកឧត្ដម ប្រាក់ សោភ័ណ អភិបាលខេត្ដ និងជាប្រធានសសយកខេត្ដសៀមរាប មានប្រសាសន៍ថា នៅឆ្នាំ២០២៤នេះ រដ្ឋបាលខេត្ដ បានសហភាពសហព័ន្ធយុវជនកម្ពុជា រៀបចំព្រឹត្តិការណ៍សៀមរាបសង្ក្រាន្ដ ដើម្បីចូលរួមអបអរសាទរពិធីបុណ្យចូលឆ្នាំថ្មី ប្រពៃណី ជាតិខ្មែរ និងទាក់ទាញភ្ញៀវជាតិ អន្តរជាតិ មកទស្សនានៅខេត្តសៀមរាប (ស្របតាមយុទ្ធនាការ ទស្សនាសៀមរាប ឆ្នាំ២០២៤)។ 

ជាមួយគ្នានេះ ក្រុមការងារ បានចូលរួមរៀបចំព្រឹត្តិការណ៍សៀមរាបសង្ក្រាន្ត ដោយបានរៀបចំបែងចែកតំបន់កម្មវិធីជា២ធំៗ ដូចជាតំបន់ទី១ មានកម្មវិធីកម្សាន្ដនៅតំបន់សួនច្បារព្រះរាជដំណាក់ រួមានកន្លែងលេងទឹកដែលជាតំបន់ត្រជាក់។ នៅតំបន់ទី២ ស្ថិតនៅតាមដងស្ទឹងសៀមរាប រហូតដល់តំបន់ផាប់ស្រ្កឹត ហើយនៅតំបន់មាត់ស្ទឹង មានកម្មវិធីជិះទូកកំសាន្ត កម្មវិធីហែរក្បួនទូក ស្តង់ពិព័រណ៍ ម្ហូបអាហារ ការប្រគុំតន្ត្រីស្គរដៃ ការសម្តែងសិល្បៈបុរាណប្រពៃណី កម្មវិធីពូនភ្នំខ្សាច់ក្នុងវត្តរាជបូណ៌ និងកម្មវិធីជាច្រើនទៀត។ឯកឧត្ដមបន្ថែមថា សៀមរាបសង្ក្រាន្តនេះ បានសាមគ្គីគ្នាជាធ្លុងមួយ ដោយបានខិតខំប្រឹងប្រែងបំពេញការងារតាមក្រុមរៀងៗខ្លួន ទោះបីអាកាសធាតុមានការប្រែប្រួលធ្វើឱ្យមានការកើនឡើងកម្ដៅខ្លាំង ប៉ុន្តែនេះមិនមែនជាបញ្ហាសម្រាប់ក្រុមការងារក្នុងការរៀបចំព្រឹត្តិការណ៍នោះទេ។

នាឱកាសនោះ ឯកឧត្ដម នាយឧត្ដមសេនីយ៍ ទៀ សីហា មានប្រសាសន៍ថា ព្រឹត្តិការណ៍សៀមរាបសង្ក្រាន្ត ២០២៤ ពិតជាមានអត្ថន័យដ៏ធំធេងក្នុងការបំផុសប្រជាជនកម្ពុជា ជាពិសេសកុលបុត្រ កុលធីតាជំនាន់ក្រោយឱ្យស្វែងយល់ ស្រឡាញ់ និងផ្សព្វផ្សាយវប្បធម៌ អរិយធម៌ ប្រពៃណី និងទំនៀមទម្លាប់ដ៏មានតម្លៃរបស់ខ្មែរ ក្នុងគោលដៅរក្សាអត្តសញ្ញាណជាតិ និងបង្កើតមោទនភាពជាតិ។ 

ឯកឧត្ដមបន្ដថា ព្រឹត្តិការណ៍នេះ ក៏ជាឱកាសមួយសម្រាប់ការជួបជុំមហាជន យុវជន ប្រជាពលរដ្ឋ ភ្ញៀវទេសចរជាតិ អន្តរជាតិ បានស្វែងយល់អំពីជំនឿសាសនា បានឃើញ និងសិក្សាបន្ថែមអំពីភាពរុងរឿងល្បីល្បាញ សម្បូរបែបនៃ វប្បធម៌ អរិយធម៌ ទំនៀមទម្លាប់ ប្រពៃណីខ្មែរ និងបន្តថែរក្សាកេរ្តិ៍មរតកទាំងនេះឱ្យបានគង់វង្ស បំផុសគំនិតរួបរួម កម្លាំងមហាសាមគ្គី និងបណ្តុះស្មារតី “អភិរក្ស ដើម្បីអភិវឌ្ឍន៍” “អភិវឌ្ឍន៍ ដើម្បីអភិរក្សវប្បធម៌ ប្រពៃណី និងអត្តសញ្ញាណជាតិខ្មែរក្នុងសម័យសាកលភាវូបនីយកម្មទំនើប” ជំនាន់ថ្មីនេះ៕