ប្រធានាធិបតីហ្វីលីពីន លោក Ferdinand Marcos Jr កាលពីថ្ងៃសុក្រ (១២ មេសា) បាននិយាយថា កិច្ចព្រមព្រៀងសហប្រតិបត្តិការរបស់ហ្វីលីពីន សហរដ្ឋអាមេរិក និងជប៉ុន នឹងកែប្រែឥទ្ធិពលនៅក្នុងសមុទ្រចិនខាងត្បូង និងតំបន់ ខណៈដែលកំពុងប្រឹងប្រែងធានាថា ប្រទេសចិនមិនមែនជាគោលដៅនោះទេ។

មួយថ្ងៃបន្ទាប់ពីជួបជាមួយប្រធានាធិបតីអាមេរិក លោក Joe Biden និងនាយករដ្ឋមន្ត្រីជប៉ុន លោក Fumio Kishida ក្នុងជំនួបកំពូលត្រីភាគីលើកដំបូងរបស់ប្រទេស លោក Marcos បានប្រាប់សន្និសីទសារព័ត៌មាននៅទីក្រុងវ៉ាស៊ីនតោនថា៖ «ខ្ញុំគិតថា កិច្ចព្រមព្រៀងត្រីភាគីមានសារៈសំខាន់ខ្លាំងណាស់»។ ដោយនិយាយសំដៅដល់សមាគមប្រជាជាតិអាស៊ីអាគ្នេយ៍ (អាស៊ាន) លោក Marcos បាននិយាយថា៖ «កិច្ចព្រៀងនេះនឹងកែប្រែឥទ្ធិពល ជាឥទ្ធិពលដែលយើងឃើញនៅក្នុងតំបន់ គឺក្នុងតំបន់អាស៊ាន នៅអាស៊ី ជុំវិញសមុទ្រចិនខាងត្បូង»។

គួរបញ្ជាក់ថា មេដឹកនាំទាំង៣ បានសម្តែងនូវ «ក្តីបារម្ភយ៉ាងខ្លាំងក្លា» អំពី «សកម្មភាពដ៏គ្រោះថ្នាក់ និងបង្កហេតុ» របស់ចិន នៅក្នុងសមុទ្រចិនខាងត្បូង ដែលជាផ្លូវសម្រាប់ពាណិជ្ជកម្មប្រចាំឆ្នាំមានតម្លៃជាង ៣សែនកោដិដុល្លារអាមេរិក ដោយមានជម្លោះដែនសមុទ្រជាច្រើន រវាងប្រទេសចិន និងប្រទេសដទៃទៀត។

យ៉ាងណាក្ដី លោក Marcos បាននិយាយថា កិច្ចប្រជុំកំពូលនេះ «មិនប្រឆាំងនឹងប្រទេសណាមួយនោះឡើយ» ប៉ុន្តែបានផ្តោតលើការធ្វើឲ្យទំនាក់ទំនងសេដ្ឋកិច្ច និងសន្តិសុខកាន់តែស៊ីជម្រៅ ក្នុងចំណោមទីក្រុងម៉ានីល វ៉ាស៊ីនតោន និងតូក្យូ៕