ក្រុមប្រឹក្សាអន្តរកាលដែលមានភារកិច្ចជ្រើសរើសនាយករដ្ឋមន្ត្រីបន្ទាប់ និងគណៈរដ្ឋមន្ត្រីរបស់ប្រទេសហៃទី ត្រូវបានបង្កើតឡើងជាផ្លូវការ ខណៈដែលក្រុមអន្ធពាលបន្តរឹតបន្តឹងការក្តាប់អំណាចរបស់ពួកគេលើប្រទេសការ៉ាអ៊ីពដែលកំពុងមានបញ្ហាមួយនេះ។

វត្តមាននៃក្រុមប្រឹក្សាដែលត្រូវបានប្រកាសនៅក្នុងក្រឹត្យមួយដែលបានចេញផ្សាយកាលពីថ្ងៃសុក្រ (ទី១២ ខែមេសា) នៅក្នុងការិយាល័យរដ្ឋាភិបាលរបស់ហៃទី ត្រូវបានគេរំពឹងថា នឹងនាំឲ្យមានការលាលែងពីតំណែងរបស់នាយករដ្ឋមន្ត្រីលោក Ariel Henry ដែលបានសន្យាថា នឹងចុះចេញពីតំណែងនៅពេលដែលក្រុមប្រឹក្សានេះត្រូវបានបង្កើតឡើង។ លោក Henry មិនបានចេញសេចក្តីអធិប្បាយភ្លាមៗនោះឡើយ បន្ទាប់ពីការចុះផ្សាយនៃក្រឹត្យនេះ។

ការបង្កើតក្រុមប្រឹក្សានេះ មានឡើងយ៉ាងពិតប្រាកដ ក្នុងរយៈពេលមួយខែបន្ទាប់ពីបណ្ដាមេដឹកនាំតំបន់ការ៉ាអ៊ីព បានប្រកាសពីផែនការជួយបង្កើតក្រុមប្រឹក្សា ដែលមានសមាជិក ៩នាក់ ដោយសមាជិក ៧រូប ទទួលបានសិទ្ធិបោះឆ្នោត។ បើយោងតាមសារព័ត៌មាន Reuters ក្រឹត្យនេះមិនបញ្ចេញឈ្មោះសមាជិកក្រុមប្រឹក្សានោះទេ ប៉ុន្តែមនុស្សមួយក្រុមដែលនៅក្នុងក្រុមប្រឹក្សាគិតត្រឹមខែមុនបានចុះហត្ថលេខាលើសេចក្តីថ្លែងការណ៍រួម។

ការវិវត្តន៍កាលពីថ្ងៃសុក្រទទួលបានការអបអរពីអ្នកដែលជឿថា ក្រុមប្រឹក្សាអាចជួយដឹកនាំប្រទេសហៃទីក្នុងទិសដៅថ្មីមួយ និងជួយលុបបំបាត់អំពើហិង្សារបស់ក្រុមអន្ធពាលដែលកំពុងរីករាលដាល ដោយអំពើហិង្សានេះបានធ្វើឲ្យរដ្ឋធានី Port-au-Prince ជាប់គាំង អស់រយៈពេលជាងមួយខែហើយ។

គួរបញ្ជាក់ថា អំឡុងពេលមានអំពើហិង្សាដែលបង្កឡើងដោយក្រុមអន្ធពាលនេះ មនុស្សជាច្រើនត្រូវបានសម្លាប់ និងជាង ៣០០.០០០នាក់ត្រូវបានផ្លាស់ប្តូរទីជម្រក។ បើយោងតាមអង្គការសហប្រជាជាតិ បានឲ្យដឹងថា នៅក្នុងប្រទេសដែលមានប្រជាជនចំនួន ១១លាននាក់នេះ ប្រហែល ១លាននាក់កំពុងស្ថិតនៅមាត់ជ្រោះនៃគ្រោះទុរ្ភិក្ស៕