កំពង់ឆ្នាំង៖ នៅព្រឹកថ្ងៃទី១៤ ខែមេសា ឆ្នាំ២០២៤នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពរដ្ឋបាលខេត្ត រួមនិងលោកឧត្តមសេនីយ៍ទោ ខូវ លី ស្នងការនគរបាលខេត្ត បានអញ្ជើញចុះពិនិត្យកម្លាំងនគរបាលតាមបញ្តាប៉ុស្តិនៅក្នុងខេត្តកំពង់ឆ្នាំង ដើម្បីពង្រឹងសុវត្ថិភាព និងសេចក្តីសុខជូនប្រជាពលរដ្ឋ ភ្ញៀវទេសចរ ក្នុងឱកាសសង្ក្រាន្តឆ្នាំថ្មីប្រពៃណីខ្មែរនេះ។

 លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំងបានអោយដឹងថា៖ ទោះបីប្រជាពលរដ្ឋទទួលបានសេចក្តីសុខសុវត្ថិភាពប៉ុណញណឹងហើយក្តី ក្នុងនាមជាកងកម្លាំងការពារសន្តិសុខ សណ្តាប់ធ្នាប់ជូនប្រជាពលរដ្ឋ និងសង្គមជាតិ ត្រូវតែយកចិត្តទុកដាក់បន្ថែមទៀតក្នុងការការពារសន្តិសុខសណ្តាប់ធ្នាប់ជូនប្រជាពលរដ្ឋ ទាំងតាមវត្តអារាម ទីរមណីដ្ឋាន ក៏ដូចជាតំបន់ប្រារព្វសង្ក្រាន្ត និងតាមផ្លូវសាធារណៈជាដើម។ លោកបានដាក់បទបញ្ជាដល់កងកម្លាំងនគរបាលទាំងអស់ ត្រូវយកចិត្តទុកដាក់រក្សាសន្តិសុខសណ្តាប់ធ្នាប់ទ្វេឡើង ដើម្បីអោយប្រជាពលរដ្ឋទទួលបានភាពកក់ក្តៅ និងមានទំនុកចិត្តលើកងកម្លាំង ។

ក្នុងពេលចុះពិនិត្យកងកម្លាំងតាមបណ្តាប៉ុស្តិក្នុងខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានបញ្ជាក់ប្រាប់មេប៉ុស្តិទាំងអស់ថា៖ ក្នុងរដូវបុណ្យចូលឆ្នាំថ្មីប្រពៃណីខ្មែរឆ្នាំនេះ កងកម្លាំងទាំងអស់ត្រូវអនុវត្តតាមអនុសាសន៍ដ៏ថ្លៃថ្លារបស់សម្តេចធិបតី ហ៊ុន ម៉ាណែត នាយករដ្ឋមន្ត្រីក្នុងការការពារសន្តិសុខសណ្តាប់ធ្នាប់អោយប្រជាពលរដ្ឋអោយល្អប្រសើរគ្រប់ទីកន្លែង ។ ត្រូវពិនិត្យតាមដងផ្លូវនូវចរាចរណ៍របស់បងប្អូនដែលធ្វើដំណើរតាមដងផ្លូវកុំអោយកកស្ទះ ត្រូវណែនាំអ្នកប្រើប្រាស់ផ្លូវអោយយល់ដឹងពីច្បាប់ចរាចរណ៍កុំអោយកើតមានគ្រោះថ្នាក់ចរាចរក្នុងរដូវចូលឆ្នាំថ្មីនេះ ណែនាំប្រជាពលរដ្ឋ និងដាក់កម្លាំងប្រចាំបញ្ជាអោយជាប់ជាប្រចាំក្នុងការជួយអន្តរាគមន៍ពេលមានអគ្គីភ័យ និងត្រូវរក្សាសន្តិសុខសណ្តាប់ធ្នាប់អោយបានល្អគ្រប់ទីកន្លែង៕ ដោយ ៖ កាំង ហុងវាស្នា