កាយសម្ព័ន្ធ៖ ជិត ៣០ឆ្នាំទៅហើយតាំងពីបង្ហាញខ្លួនដំបូងនៅព្រឹត្តិការណ៍អូឡាំពិក ជួបជាមួយគូប្រកួតដែលក្មេងជាងកូនប្រុសរបស់ខ្លួននៅទៀត កីឡាការិនីកាយសម្ព័ន្ធអ៊ូសប៊ែគីស្ថាន Oksana Chusovitina បានប្រកាសចូលនិវត្តន៍ហើយ ក្រោយបង្ហាញខ្លួននៅព្រឹត្តិការណ៍អូឡាំពិក ៨លើកក្នុងអាជីព។
កីឡាការិនីវ័យ ៤៦ឆ្នាំរូបនេះបានប្រកាសចូលនិវត្តន៍បន្ទាប់ពីប្រកួតថ្ងៃទី២ កីឡាកាយសម្ព័ន្ធអាទីសស្ទិកប្រើឧបករណ៍វគ្គជំរុះកាលពីថ្ងៃអាទិត្យ និងបាននិយាយលាពីអាជីពរបស់ខ្លួនទាំងទឹកភ្នែក។ Oksana Chusovitina ដែលបង្ហាញខ្លួនដំបូងនៅអូឡាំពិកទាំងពីឆ្នាំ១៩៩២ នៅទីក្រុង Barcelona ប្រទេសអេស្ប៉ាញនោះបានបញ្ចប់ត្រឹមចំណាត់ថ្នាក់លេខ ១៤ មិនអាចឈានចូលជុំបន្តបាន តែកីឡាការិនីវ័យ ៤៦ឆ្នាំរូបនេះបាននិយាយថា សប្បាយរីករាយ និងមានមោទនភាព។ Chusovitina បានឈ្នះមេដាយមាសក្នុងការបង្ហាញខ្លួនលើកដំបូងនៅអូឡាំពិក តែជាការប្រកួតជាក្រុម និងប្រកួតក្រុមតំណាងឱ្យអតីតសហភាពសូវៀត។ កើតនៅទីក្រុង Bukahara ប្រទេសអ៊ូសប៊ែគីស្ថានឆ្នាំ១៩៧៥, Chusovitina ក៏ធ្លាប់ប្រកួតតំណាងឱ្យអាល្លឺម៉ង់ផងដែរ ក្រោយរស់នៅទីនោះរយៈពេល ៣ឆ្នាំទទួលបានសញ្ជាតិអាល្លឺម៉ង់។
និយាយពីសមិទ្ធផលដែលទទួលបានក្នុងការប្រកួតអន្តរជាតិនានាតាំងពីវ័យ ១៤ឆ្នាំរាប់ពីឆ្នាំ ១៩៨៩ គឺរាប់មិនអស់ឡើយដោយធ្លាប់ឈ្នះមេដាយនានាដូចជា អូឡាំពិក (ឈ្នះមេដាយមាស១ និងប្រាក់២), ជើងឯកពិភពលោក (ឈ្នះមេដាយមាស៣ ប្រាក់៤ និងសំរឹទ្ធ៤), កីឡាអាស៊ី (ឈ្នះមេដាយមាស២ ប្រាក់៤ និងសំរឹទ្ធ២), ជើងឯកអាស៊ី (ឈ្នះមេដាយប្រាក់៣ និងសំរឹទ្ធ១) និងជើងឯកអឺរ៉ុប (ឈ្នះមេដាយមាស១ ប្រាក់២ និងសំរឹទ្ធ១)៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
