​វាយ​កូន​បាល់៖ ​កីឡាករ​វាយ​កូន​បាល់​តំណាងឱ្យ​ចក្រភព​អង់គ្លេស Andy Murray បាន​បង្ខំចិត្ត​ដកខ្លួន​ពី​ការប្រកួត​ព្រឹត្តិការណ៍អូឡាំពិក​ទីក្រុង​តូ​ក្យូ​ប្រទេស​ជប៉ុន​ ក្នុង​វិញ្ញាសា​ឯកត្តជន​បុរស​ដោយសារ​របួស​ភ្លៅ​។

​​កីឡាករ​ស្កុ​ត​ឡេ​ន​រូបនេះរកបាន​ជ័យជំនះ​ក្នុង​ប្រកួត​ដំបូង ​តែ​នៅ​វិញ្ញាសា​វាយ​គូ​បុរស​កាលពី​ថ្ងៃ​សៅរ៍​ចាប់​ដៃគូជាមួយ Joe Salisbury ហើយក៏​ត្រូវ​ជួប​ជាមួយ​កីឡាករ​កាណាដា Felix Auger-Aliassime នៅ​ថ្ងៃអាទិត្យ​ម្សិលមិញ​នេះ​។​ ​​កីឡាករ​វ័យ ៣៤ឆ្នាំ​រូបនេះ​នឹង​នៅតែ​ប្រកួត​នៅ​វិញ្ញាសា​វាយ​គូ​បុរស​ដដែល តែ​ត្រូវបាន​ក្រុមគ្រូពេទ្យ​ណែនាំ​មិនឱ្យប្រកួត​ទាំង ២​វិញ្ញាសា​ក្នុង​មួយ​ព្រឹត្តិការណ៍​អូឡាំពិក​នេះ​។ ​​ការដកខ្លួន​ពី​វិញ្ញាសា​ឯកត្តជន​បុរស​នេះ ​ធ្វើឱ្យ​ក្រុម​វាយ​កូន​បាល់​ចក្រភព​អង់គ្លេសនៅសល់តែ​កីឡាករ Liam Broady តែ​ម្នាក់​ប៉ុណ្ណោះ​។​

​​រំលឹកថា Andy Murray ធ្លាប់​ឈ្នះ​មេដាយមាស​អូឡាំពិក​លើកដំបូង​នៅ​ឆ្នាំ២០១២ នៅ​ទីក្រុង​ឡុង​ដ៍ និង​លើក​ទី​ពីរ​នៅ​ឆ្នាំ២០១៦ នៅ​ទីក្រុង Rio ប្រទេស​ប្រេ​ស៊ី​ល​។ ​​យ៉ាងណាក្តី កីឡាករ​ជើងឯក Grand Slam បី​លើក​របស់​ស្កុ​ត​ឡេ​ន​រូបនេះ​មាន​របួស និង​ទទួល​ការវះកាត់​ត្រកៀក និង​បញ្ហា​របួស​ញាំញី​ប៉ុន្មាន​ឆ្នាំ​ចុង​ក្រោយនេះ​៕

​អត្ថបទ​៖​នាង សុភា​វុ​ធ