ប្រជាជនហ្កាហ្សារាប់ពាន់នាក់ បានប្រមូលផ្តុំគ្នានៅលើផ្លូវឆ្នេរសមុទ្រ ភាគ​ខាង​ជើង​កាល​ពី​ថ្ងៃ​អាទិត្យ​ បន្ទាប់ពីបានឮថា មនុស្សមួយចំនួន បានព្យាយាម​ឆ្លង​កាត់​ប៉ុស្តិ៍​ត្រួត​ពិនិត្យ​ដែល​ត្រូវ​គេ​បិទ​មួយ​ឆ្ពោះទៅកាន់ទីក្រុងហ្កាហ្សា ទោះបីជាអ៊ីស្រាអែល បានបដិសេធថា ប៉ុស្តិ៍នោះ មិន​បើក​ក៏​ដោយ​។

អ្នកសារព័ត៌មាន AFP ម្នាក់ បានឃើញម្តាយកាន់ដៃកូនៗរបស់ពួកគេ និងក្រុមគ្រួសារ ដាក់​អីវ៉ាន់​លើ​រទេះ​សត្វលា នៅពេលពួកគេ ធ្វើដំណើរ។

ពួកគេ​សង្ឃឹមថា នឹងឆ្លងកាត់ប៉ុស្តិ៍ត្រួតពិនិត្យយោធាមួយ នៅលើផ្លូវAl-Rashid ភាគខាង​ត្បូង​នៃ​ទី​ក្រុង​ហ្កាហ្សា ប៉ុន្តែកងទ័ពអ៊ីស្រាអែល បានប្រាប់សារព័ត៌មាន AFP ថា របាយការណ៍ដែលថា ផ្លូវ​នេះ ត្រូវបានបើកគឺ «មិនពិត»ទេ។

មួយវិញ​ទៀត គ្រួសារដែលអស់សង្ឃឹម បានរង់ចាំមនុស្សជាទីស្រលាញ់របស់ពួកគេ នៅក្នុងគំនរ​បាក់​បែក​នៃ​ទីក្រុងដែលបានរងការវាយប្រហារ នៅក្នុងទឹកដីប៉ាឡេស្ទីននេះ។

លោក Mahmoud Awdeh បាននិយាយថា ខ្លួនកំពុងរង់ចាំប្រពន្ធ ដែលបាន​នៅ​ក្នុង​ទី​ក្រុង​ខាន់​យូនីស ភាគខាងត្បូង ចាប់តាំងពីការចាប់ផ្តើមនៃសង្រ្គាមនៅថ្ងៃទី៧ ខែតុលា។