បាត់ដំបង៖ រយៈពេល៣ថ្ងៃក្នុងឱកាសពិធីបុណ្យចូលថ្មីប្រពៃណីជាតិខ្មែរ មានភ្ញៀវទេសចរជាតិ អន្តរជាតិ និងបងប្អូនប្រជាពលរដ្ឋ​សរុបជាង​១លាននាក់​បាន​មក​ទស្សនា​កម្សាន្ត​សប្បាយ​ក្នុង​ព្រឹត្តិការណ៍​សង្រ្កាន្តបាត់ដំបង និងតាមបណ្ដារមណីយដ្ឋាននានានៅទូទាំងខេត្តបាត់ដំបង។

យោងតាមរបាយការណ៍របស់មន្ទីរទេសចរណ៍ខេត្តបាត់ដំបង បានឱ្យដឹងថា នៅថ្ងៃទី១ នៃ​ពិធី​បុណ្យចូ​លឆ្នាំប្រពៃណីជាតិខ្មែរ ត្រូវនឹងថ្ងៃទី១៣ ខែមេសា ឆ្នាំ២០២៤ ខេត្តបាត់ដំបង ទទួល​បាន​ភ្ញៀវ​ទេសចរសរុប ១៥៩,១៦៩ នាក់ ក្នុងនោះភ្ញៀវទេសចរជាតិ ១៥៨,៧១១នាក់ ភ្ញៀវ​ទេសចរ​អន្តរជាតិ ៤៥៨ នាក់។ នៅថ្ងៃទី២ នៃពិធីបុណ្យចូលឆ្នាំថ្មីប្រពៃណីជាតិខ្មែរ ទទួល​បាន​ភ្ញៀវ​ទេសចរ​សរុប ៣៩៥,១៨៩ នាក់ ក្នុងនោះភ្ញៀវទេសចរជាតិ ៣៩៤,៤៦៨ នាក់ និង​ភ្ញៀវ​ទេសចរ​អន្តរជាតិ​ ៧២១ នាក់។ ចំណែកនៅថ្ងៃទី៣នៃពិធីបុណ្យចូលឆ្នាំថ្មីប្រពៃណីជាតិខ្មែរ ទទួល​បាន​ភ្ញៀវ​ទេសចរសរុប ៥១៩,២៨៨ នាក់ ក្នុងនោះភ្ញៀវទេសចរជាតិ ៥១៨,៣៧៦ នាក់ និងភ្ញៀវទេសចរ​អន្តរជាតិ ៩១២ នាក់៕