កោះកុង៖ ខេត្តកោះកុងទទួលភ្ញៀវទេសចរប្រមាណ ១ម៉ឺន៨ពាន់នាក់ ក្នុង​កំឡុង​ពិធី​បុណ្យ​ចូលឆ្នាំថ្មី​ប្រពៃណីជាតិខ្មែរ រយៈពេល៣ថ្ងៃមកនេះ ក្នុងនោះភ្ញៀវទេសចរ​ភាគច្រើន​ទៅ​លេង​កម្សាន្ត​នៅ​តំបន់កោះនានា និងមុខសាលាខេត្ត។

គិតចាប់ពីថ្ងៃទី១៣ដល់ថ្ងៃទី១៥ ខែមេសា ឆ្នាំ២០២៤ គ្រប់ភ្ញៀវទេសចរជាតិ និង​អន្តរជាតិ​បាននាំ​គ្នា​មកលេងកម្សាន្តតាមរមណីយដ្ឋាននានាក្នុងខេត្តកោះកុង ពិសេសតំបន់ឆ្នេរសមុទ្រ ដែនកោះ និង​តំបន់ត្រជាក់ចិត្តមុខសាលាខេត្ត។

លោក សាគុណ ភក្តី ប្រធានការិយាល័យ​ផ្សព្វផ្សាយ​ព័ត៌មាន​ទេសចរណ៍​នៃ​មន្ទីរ​ទេសចរណ៍​ខេត្តកោះកុង បានឱ្យដឹងនៅថ្ងៃទី១៦ ខែមេសា នេះថា ទេសចរជាតិមានចំនួន១ម៉ឺន៧ពាន់នាក់ ចំណែក​ភ្ញៀវទេសចរបរទេសចំនួន៦៨០នាក់។ បើធៀបនឹងរយៈពេលដូចគ្នាឆ្នាំទៅ មិនអាច​ប៉ាន់ស្មាន​បាននៅឡើយ លុះត្រាម៉ោង៦ល្ងាចនេះ បានសរុបចំនួន៤ថ្ងៃតែម្តង។

បើតាមលោក សាគុណ ភក្តី បន្ថែមថាទៀតថា តួលេខភ្ញៀវទេសចរនេះ មិនបូកបញ្ចូល​ជាមួយ​ប្រជាពលរដ្ឋ​មកលេងកម្សាន្តនៅក្នុងតំបន់ត្រជាក់ចិត្តមុខសាលាខេត្តនោះទេ។ ហើយ​តំបន់​ទេសចរណ៍​ដែលជាទីចាប់អារម្មណ៍ជាងគេនៅលើកោះស្តេច ស្រុកគិរីសាគរ ឆ្នេរនេសាទ ស្រុក​ស្រែ​អំបិល ទឹកជ្រោះតាតៃ ស្រុកកោះកុង និងឆ្នេរប៉ាក់ខ្លង់ ស្រុកមណ្ឌលសីមា។

គួរជម្រាបថា ម្សិលមិញនេះ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និង​លោក​ជំទាវ ឯកឧត្តម កាយ សំរួម ប្រធានប្រឹក្សាខេត្ត ព្រមទាំងលោកជំទាវ មិថុនា ភូថង អភិបាល​ខេត្តកោះកុង បានអញ្ជើញក្នុងពិធីស្រង់ព្រះ ដើម្បីសុំសេចក្តីសុខសប្បាយឆ្នាំថ្មី ដោយ​មាន​ព្រះសង្ឃសូត្រធម៌ប្រាស់ព្រំសិរីសួស្តីដល់ថ្នាក់ដឹកនាំ ក៏ដូចជាប្រជាពលរដ្ឋ៕ អត្ថបទ៖ ឈឹម មករា