ខណៈនៅថ្ងៃទី១៧ ខែមេសា ឆ្នាំ២០២៤នេះ គឺជាថ្ងៃបញ្ចប់ នៃពិធីបុណ្យចូលឆ្នាំថ្មី​ប្រពៃណីជាតិ​ខ្មែរ បងប្អូនប្រជាពលរដ្ឋបាននាំគ្នាទៅលេងកម្សាន្តនៅសង្ក្រាន្តខេត្តកណ្តាល ជាបន្ត​បន្ទាប់ ដើម្បី​ចូល​រួម​កម្សាន្តជាមួយកម្មវិធីសប្បាយរីករាយជាច្រើន ជាពិសេសការលេងល្បែងប្រជាប្រិយខ្មែរ ដែល​រដ្ឋបាលខេត្តបានរៀបចំឡើងក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ គ្រិស្តសករាជ ២០២៤នេះ។

ទីតាំង​នៃ​ការរៀបចំសង្ក្រាន្ត គឺធ្វើឡើងនៅដងផ្លូវជួរមាត់ទន្លេក្រុងតាខ្មៅ ដោយមាន​ការតុ​ប​តែង​លម្អ​រនូវ​សម្ភារៈជាច្រើន រំលិចពីវប្បធម៌ប្រពៃណី រួមទាំងល្បែងប្រជាប្រិយកម្សាន្តរបស់ខ្មែរផងដែរ ដោយ​មានពលរដ្ឋ បាននឹងកំពុងដើរលេងកម្សាន្តយ៉ាងសប្បាយរីករាយបំផុត បើទោះ​បី​នៅវេ​លា​ថ្ងៃត្រ​ង់​នេះ អាកាសធាតុហាក់ក្តៅគួរសមក៏ពិតមែនក៏ដោយ ។

ប្រជាពលរដ្ឋ ដែលបានមកដើរលេងកម្សាន្តនៅសង្ក្រាន្តខេត្តកណ្តាល ក៏បាន​បង្ហាញ​ក្តី​សប្បាយ​រីក​រាយ ពេលបានមកកម្សាន្ត និងបានមើលឃើញថា អាជ្ញាធរបានរៀបចំទីតាំងបានស្អាតល្អ សម្រាប់​ពលរដ្ឋ​ទាំង​ក្នុង និងក្រៅតំបន់ អាចមកចូលរួមបានដោយស៊េរី ។ ពលរដ្ឋ បន្តថា ពួកគាត់បានចូលរួមកម្មវិធីសង្ក្រាន្តនៅតាមទីតាំងផ្សេងៗមួយចំនួនរួចមកហើយ ហើយដោយ​សារ​ថ្ងៃ​នេះ​ជា​ថ្ងៃបញ្ចប់ នៃបុណ្យចូលឆ្នាំ ពួកគាត់ក៏សម្រេចចិត្តមកកម្សាន្តលេងនៅក្រុងតាខ្មៅ ក្នុង​ខេត្ត​កណ្តាលម្តងដើម្បីទទួលបានបរិយាកាសថ្មី ។

បើទោះបីជានៅវេលាថ្ងៃត្រង់នេះ ចំនួនបងប្អូនប្រជាពលរដ្ឋ​ហាក់​នៅមិន​ទាន់​សម្រុក​មក​លេង​កម្សាន្ត​ច្រើននៅឡើយក៏ដោយ ប៉ុន្តែការការ​ពារ​សន្តិសុខ​សុវត្ថិភា​ព​នៅ​តាម​ដង​ផ្លូវ​ខ្វាត់​ខ្វែង​ជុំវិញ​ទីតាំង​ប្រារព្ធ​សង្ក្រាន្ត គឺនៅតែមានការ​យក​ចិត្ត​ទុក​ដាក់​ខ្ពស់​ពី​សំណាក់​កង​កម្លាំង​សមត្ថកិច្ច​សាធារណៈ​ដូចសព្វមួយដងដដែល ក្នុងការធានាសុវត្ថិភាព១០០ភាគរយ ជូនបងប្អូន​ប្រជាពលរដ្ឋ​ដែ​លមកដើរលេងកម្សាន្ត ។

សូមបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរ ប្រារព្ធឡើងរយះពេល០៤ថ្ងៃ គិតចាប់​ពី​ថ្ងៃ​ទី១៣ ដល់ថ្ងៃទី១៦ ខែមេសា ឆ្នាំ២០២៤ ហើយថ្ងៃនេះ គឺជាថ្ងៃបញ្ចប់ពិធីបុណ្យទាំងស្រុង ដោយ​នៅ​តាម​បណ្តារាជធានីខេត្តទាំង២៥ក្នុងប្រទេស ក៏នឹងមានការរៀបចំសង្ក្រាន្តថ្ងៃបញ្ចប់ដូចៗគ្នា នៅតាមបណ្តាមូលដ្ឋានរបស់ខ្លួន ៕ អត្ថបទ ៖ លីហេង