ភ្នំពេញ៖ ពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៤ ត្រូវបានប្រារព្ធធ្វើពិធីចំនួនបីថ្ងៃ៤ ចាប់​ពីថ្ងៃទី១៣-១៦ ខែមេសា ឆ្នាំ២០២៤ បើយើងពិនិត្យ​ជារួមទូទាំង​ព្រះរាជាណាចក្រ​កម្ពុជា​យើង​នៅ​គ្រប់​បណ្ដារាជធានី ខេត្ត ក្រុង ភូមិ ឃុំ សង្កាត់ និងតាមទីវត្តអារាម សាលារៀន កងឯកភាព ស្ថាប័នរដ្ឋ ក្រុមហ៊ុន មណ្ឌលកម្សាន្តរមណីយដ្ឋានទេសចរណ៍នានា ត្រូវបាន​រៀបចំ​សង្ក្រាន្ត​តាម​លក្ខណៈប្រពៃណីខ្មែរដោយមានតុបតែងលម្អរតាំងបង្ហាញនូវសមិទ្ធផលនានា របស់​ជាតិ​ក៏​ដូច​ជា​សមិទ្ធផលរបស់បណ្ដារាជធានី ខេត្ត ក្រុង ទៅតាមអ្វីដែលខ្លួនមាន ដើម្បី​រំលេច​អំពី​អត្ត​សញ្ញាណ​ជាតិ​ខ្មែរ និងមានចាត់តាំង​លេង​កម្សាន្ត​នូវ​ល្បែង​ប្រជាប្រិយ​ផ្សេងៗ​ចូលរួម​អបអរ​សាទរ​ទទួល​ទេវតា​ឆ្នាំថ្មីនេះផងដែរ។

ដោយឡែកបញ្ជាការដ្ឋានទ័ពពិសេសកងទ័ពជើងគោក ក្រោមការដឹកនាំរបស់ ឯកឧត្តម ឧត្តម​សេនីយ៍​ទោ ស៊ុំ សំណាង មេបញ្ជាការ បញ្ជាការដ្ឋានទ័ពពិសេសកងទ័ពជើងគោក បានដាក់​ចេញ​នៅ​ផែនការត្រៀមប្រយុទ្ធយ៉ាងម៉ឺងម៉ាត់តាមបទបញ្ជារបស់ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ចាត់​តាំង​ឲ្យ​បណ្ដាកងឯកភាពចំណុះលេងល្បែងប្រជាប្រិយកម្សាន្តរយ:ពេល៤ថ្ងៃ ក្នុងថ្ងៃ​បុណ្យ​ចូលឆ្នាំថ្មី​នេះ​ដោយសហការជាមួយអាជ្ញាធរ ប្រជាពលរដ្ឋនៅក្នុងតំបន់ ក៏ដូចជាគ្រួសារកងទ័ព ដើម្បី​ចាត់តាំងលេងល្បែងប្រជាប្រិយ៍កម្សាន្ត សំដៅបង្ហាញអំពីការអភិរក្ស និងថែរក្សា​នៅ​ល្បែង​ប្រជាប្រិយ​ប្រពៃណីជាតិខ្មែរដ៏ល្អផូរផង់របស់ដូនតាយើងបានបន្សល់ទុក ក្នុងនោះដូចជា​ល្បែង​វាយ​ក្អម លោតបាវ ទាញព្រាត់ ចោលឈូង ដណ្ដើមស្លឹកឈើ លាក់កន្សែង ពាំពងទា បូមទឹក​ដាក់​ដប ចងមុខចាប់ទា ឡើងសសរខ្លាញ់ រាំលេងដណ្តើមកៅអី រត់ប្រណាំង ប្រដាល់គុនខ្មែរ និង​ល្បែង​ប្រជាប្រិយផ្សេងៗទៀត។ល។

ចំពោះការចាត់តាំង និងការធានាថវិកា សម្ភារ:ទ្រទ្រង់លេងល្បែងប្រជាប្រិយកម្សាន្តនេះ គឺបាន​មក​ពី​ការ​ឧបត្ថម្ភផ្ទាល់ទាំងស្មារតី និងសម្ភារៈថវិការបស់ ឯកឧត្តម ឧត្តមសេនីយ៍ទោ ស៊ុំ សំណាង មេ​បញ្ជាការអង្គភាព និងលោកជំទាវ សាំង សុខណា ដោយឯកឧត្តម និងលោកជំទាវ បាន​ដោះ​ស្រាយ​ការ​ធានាហូបចុក និងធ្វើជាប្រាក់​រង្វាន់​ដល់​បងប្អូន​យើង​ទាំង​អស់​ដែល​បាន​ចូល​រួម​លេង​កម្សាន្ត ដោយមានការ​ផ្តល់​រង្វាន់​លើក​ទឹកចិត្ត​គ្រប់​ប្រភេទ​ល្បែង​ប្រជាប្រិយ និង​កីឡា​ប្រដាល់​គុន​ខ្មែរ​ ព្រមទាំងរង្វាន់ឆ្នោតលើកទឹកចិត្តដល់អ្នកចូលរួមផងដែរ សរុបមក​វិញ​ជំនួយ​ឧបត្ថម្ភ​បាន​ធ្វើ​ឲ្យ​កម្ម​វិធី​មួយ​នេះប្រព្រឹត្តទៅយ៉ាងរលូន និងមានភាពសប្បាយរីករាយយ៉ាងក្រៃលែង៕