បន្ទាប់ពីសង្គ្រាមរយៈពេលមួយឆ្នាំ ពលរដ្ឋនៅក្នុងទីក្រុងអំឌូម៉ាន(Omdurman) ប្រទេសស៊ូដង់និយាយថា ពួកគេត្រូវបានគេបំភ្លេចចោល។ ជម្លោះនៅប្រទេសស៊ូដង់ បានបំផ្លាញលំនៅឋានជាច្រើនខ្នង និងហេដ្ឋារចនាសម្ព័ន្ធ ដែលបានបង្កើតវិបត្តិភៀសខ្លួនធំបំផុតរបស់ពិភពលោក និងបានសម្លាប់ជនស៊ីវិលរាប់ពាន់នាក់។ ប៉ុន្តែកិច្ចខិតខំប្រឹងប្រែង ដើម្បីជួយមនុស្សរាប់លាននាក់ ដែលឈានដល់ដំណាក់កាលទុរ្ភិក្ស ត្រូវបានរារាំងដោយការប្រយុទ្ធគ្នានៅបន្ត ការរឹតត្បិតដែលដាក់ដោយភាគីសង្រ្គាម និងតម្រូវការពីម្ចាស់ជំនួយអន្តរជាតិចំពោះវិបត្តិផ្សេងៗនៅទូទាំងពិភពលោក។
ប្រភពផ្នែកការទូត បាននិយាយថា គេសង្ឃឹមថាម្ចាស់ជំនួយនឹងផ្តល់មូលនិធិ ជាងមួយពាន់លានអឺរ៉ូ សម្រាប់ប្រទេសស៊ូដង់ ហើយសហភាពអឺរ៉ុបសន្យាផ្តល់ជំនួយចំនួន ៣៥០លានអឺរ៉ូ និងប្រទេសបារាំង ១១០ លានអឺរ៉ូ ខណៈសហរដ្ឋអាមេរិកនឹងវិនិយោគសរុប ១៤៧លានដុល្លារ។ កាលពីព្រឹកថ្ងៃចន្ទ ប្រទេសអាល្លឺម៉ង់ បានសន្យាផ្តល់ជំនួយ ២៤៤ លានអឺរ៉ូ។
ទោះបីជាយ៉ាងណា ការឆ្លើយតបជាអន្តរជាតិចំពោះវិបត្តិនៅស៊ូដង់ ត្រូវបានរិះគន់ ដោយបេសកជនពិសេសរបស់សហរដ្ឋអាមេរិកប្រចាំប្រទេសស៊ូដង់ លោក ថម ភឺរៀលឡូ(Tom Perriello) កាលពីសប្តាហ៍មុន ដែលបានពិពណ៌នាថា ជា«ទុក្ខលំបាកខ្លាំង»។ អង្គការសហប្រជាជាតិ បានអំពាវនាវឱ្យផ្តល់ជំនួយចំនួន ២,៧ ពាន់លានដុល្លារនៅក្នុងប្រទេសនេះ និង ១,៤ ពាន់លានដុល្លារសម្រាប់ជំនួយនៅក្នុងបណ្តាប្រទេសជិតខាង ដែលបានទទួលជនភៀសខ្លួនរាប់សែននាក់។ និយាយក្នុងសន្និសីទសារព័ត៌មាន រដ្ឋមន្ត្រីការបរទេសបារាំង បាននិយាយថាការអំពាវនាវរបស់អង្គការសហប្រជាជាតិ ទទួលបានតែ ៥%ប៉ុណ្ណោះ។
អង្គការសុខភាពពិភពលោក បាននិយាយថា ស្ថានភាពនៅក្នុងប្រទេសស៊ូដង់អាចកាន់តែធ្ងន់ធ្ងរទៅៗក្នុងប៉ុន្មានខែខាងមុខនេះ ដោយសារការចែកចាយជំនួយមនុស្សធម៌ និងការផ្គត់ផ្គង់ផ្នែកវេជ្ជសាស្រ្តនៅតែមានការរឹតត្បិត។ កងទ័ពស៊ូដង់ បាននិយាយថា ពួកគេនឹងមិនអនុញ្ញាតឱ្យផ្តល់ជំនួយចូលទៅកាន់ផ្នែកមួយចំនួនរបស់ប្រទេសដែលគ្រប់គ្រងដោយកងកម្លាំងគាំទ្ររហ័សជាគូប្រជែងនោះទេ។
ទីភ្នាក់ងារជំនួយបានចោទប្រកាន់កងកម្លាំងគាំទ្ររហ័ស(RSF) ពីបទលួចជំនួយ ប៉ុន្តែក្រុមនេះបានបដិសេធ។