គណៈកម្មការជាតិគ្រប់គ្រងគ្រោះមហន្តរាយរបស់ប្រទេសអូម៉ង់ (NCEM) បានរាយការណ៍ថាមនុស្សយ៉ាងហោចណាស់១៧នាក់ បានស្លាប់ ក្នុងទឹកជំនន់ដ៏គំហុកបនង្កឡើងដោយភ្លៀងធ្លាក់ខ្លាំង ទូទាំងប្រទេសអូម៉ង់ចាប់តាំងពីថ្ងៃអាទិត្យចុងសប្ដាហ៍នេះមក។

នៅថ្ងៃអង្គារនេះ រដ្ឋាភិបាល បានផ្អាកការងាទាំងអស់នៅក្នុងវិស័យសាធារណៈ និងឯកជន នៅក្នុងទីក្រុងចំនួន៥ រួមទាំងទីក្រុង មូសានដាំ (Musandam)ទីក្រុង អាល់ ប៊ូរ៉ៃមី(Al Buraimi) ទីក្រុង អាល់ ដាហ៊ីរ៉ា (Al Dhahirah) និងទីក្រុង អាល់ ដាកហ៊ីលីយ៉ា (Al Dakhiliyah) ដោយសារស្ថានភាពអាកាសធាតុអាប់អួរខ្លាំង។

រដ្ឋាភិបាល បានអនុញ្ញាតឲ្យបុគ្គលិកធ្វើការតាមonline ប្រសិនបើអាចធ្វើបាន។

យោងតាមរបាយការណ៍របស់ទីភ្នាក់ងារOCHA នៃអង្គការសហប្រជាជាតិ កាលពីថ្ងៃចន្ទ ក្រុមអាជ្ញាធរនៅក្នុងប្រទេសអូម៉ង់កំពុងធ្វើប្រតិបត្តិការជួយសង្រ្គោះ បន្ទាប់ពីការប្រកាសថាសាលារៀងទាំងអស់នៅក្នុងទីក្រុងចំនួន៦រួមទាំងទីក្រុង មូស្កាត (Muscat)  ត្រូវបានបិទកាលពីថ្ងៃចន្ទដើមសប្ដាហ៍នេះ ដោយសារតែស្ថានភាពអាកាសធាតុមិនល្អ ។ 

គេរំពឹងថា ភ្លៀងធ្លាក់ខ្លាំង នឹងកើតមាននៅទូទាំង ភាគភាគឦសាន និងខាងជើង របស់ប្រទេសអូម៉ង់ ក្នុងពេលប៉ុន្មានថ្ងៃខាងមុខទៀតនេះ ៕