អាជ្ញាធរសុខាភិបាលប៉ាឡេស្ទីន បាននិយាយកាលពីថ្ងៃចន្ទថា ចំនួនអ្នកស្លាប់ប៉ាឡេស្ទីនពីការវាយប្រហាររបស់អ៊ីស្រាអែលដែលនៅតែបន្តលើតំបន់ហ្កាហ្សាស្ទ្រីប បានកើនឡើងដល់ ៣៣.៧៩៧ នាក់។ ក្នុងរយៈពេល២៤ម៉ោងកន្លងទៅនេះ កងទ័ពអ៊ីស្រាអែលបានសម្លាប់ប្រជាជនប៉ាឡេស្ទីន ចំនួន ៦៨នាក់ និងរបួស៩៤នាក់ផ្សេងទៀត ដែលនាំឱ្យចំនួនអ្នកស្លាប់សរុបកើនឡើងដល់ ៣៣.៧៩៧ នាក់ និងរបួសឡើងដល់ ៧៦.៤៦៥នាក់ ចាប់តាំងពីជម្លោះរវាងអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី ៧ ខែតុលា ឆ្នាំ ២០២៣ មក។

យោធាអ៊ីស្រាអែល បានចេញសេចក្តីថ្លែងការណ៍មួយកាលពីថ្ងៃចន្ទ ដោយព្រមានពលរដ្ឋតំបន់ហ្កាហ្សា កុំឱ្យត្រឡប់ទៅតំបន់ភាគខាងជើងវិញ។ អ្នកនាំពាក្យកងទ័ពអ៊ីស្រាអែល បាននិយាយថា តំបន់ហ្កាហ្សាភាគខាងជើង នៅតែជាតំបន់សង្គ្រាមដ៏គ្រោះថ្នាក់។ យោងតាមប្រព័ន្ធផ្សព្វផ្សាយប៉ាឡេស្ទីន បានឲ្យដឹងថា យានដ្រូនរបស់អ៊ីស្រាអែល ១៥គ្រឿង បានទម្លាក់គ្រាប់បែកលើក្រុមពលរដ្ឋនៅភាគខាងជើងជំរំជនភៀសខ្លួន នូសេរ៉ាត(Nuseirat) នៅតំបន់ហ្កាហ្សាភាគកណ្តាល ដោយបានសម្លាប់ពលរដ្ឋប៉ាឡេស្ទីនយ៉ាងហោចណាស់ពីរនាក់ និងច្រើននាក់ទៀតរងរបួស។

ប្រភពពីអាជ្ញាធរប៉ាឡេស្ទីនបាននិយាយថា ទូកជាច្រើនគ្រឿងរបស់កងទ័ពជើងទឹកអ៊ីស្រាអែល បានបើកការបាញ់រះទៅលើប្រជាជនភៀសខ្លួនប៉ាឡេស្ទីនរាប់សិបនាក់ ដែលកំពុងស្វែងរកការវិលត្រឡប់ទៅលំនៅឋានរបស់ពួកគេវិញនៅភាគខាងជើងតំបន់ហ្កាហ្សាស្ទ្រីប កាលពីថ្ងៃចន្ទដោយបានបណ្តាលឱ្យមនុស្សយ៉ាងហោចណាស់ប្រាំនាក់រងរបួស។

អ៊ីស្រាអែល បាននិងកំពុងបើកការវាយលុកទ្រង់ទ្រាយធំលើក្រុមហាម៉ាសនៅតំបន់ហ្កាហ្សាស្ទ្រីប ក្នុងការសងសឹកលើក្រុមហាម៉ាស ដែលបានវាយសម្រុកចូលឆ្លងកាត់ភាគខាងត្បូងប្រទេសអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ដែលអំឡុងពេលនោះមនុស្សប្រហែល ១.២០០នាក់ ត្រូវបានសម្លាប់ និងជាង ២០០នាក់ ត្រូវបានចាប់ជាចំណាប់ថ្នូរ។