ខណៈដែលពិធីបុណ្យប្រពៃណីជាតិខ្មែរ ត្រូវបានបញ្ចប់ដោយភាពសម្បូរសប្បាយនៅទូទាំងរាជធានីខេត្ត នៃប្រទេសកម្ពុជា នៅព្រឹកថ្ងៃទី១៧ ខែមេសា ឆ្នាំ២០២៤នេះ ប្រជាពលរដ្ឋជាច្រើននាក់បានវិលត្រឡប់ចូលរាជធានីភ្នំពេញ ដើម្បីចូលបំពេញការងារ និងប្រកបអាជីវកម្មឡើងវិញ ជាមួយនឹងទឹកមុខសប្បាយរីករាយ។
ប្រជាពលរដ្ឋដែលរស់នៅរាជធានីភ្នំពេញ ក្នុងកិច្ចសម្ភាសន៍ជាមួយព័ត៌មាន ប៊ីធីវី បានឲ្យដឹងស្រដៀងគ្នាថា ក្នុងថ្ងៃឈប់សម្រាកនាឱកាសបុណ្យចូលឆ្នាំនេះ ពិតជាមានក្តីសប្បាយរីករាយជាងឆ្នាំកន្លងៗទៅ ដោយសារតែបានជួបជុំគ្រួសារ និងសាច់ញាតិ ជាពិសេសបានចូលរួមការរៀបចំពិធីសង្រ្កាន្តនានានៅតាមតំបន់រមណីយដ្ឋាន និងទីវត្តអារាម ក៏ដូចជាបានលេងល្បែងប្រជាប្រិយជាមួយបងប្អូនជិតឆ្ងាយ អមជាមួយនឹងបរិយាកាសអធិកអធម ក្រោមប្រទេសមានសុខសន្តិភាព។ ពួកគាត់បានឲ្យដឹងទៀតថា ឆ្នាំនេះទោះបីជាមិនបានដើរលេងកម្សាន្តច្រើន ប៉ុន្តែមានអារម្មណ៍ថាសប្បាយរីករាយជាច្រើន ដោយសារបានឃើញទិដ្ឋភាពនានាតាមបណ្តាញសង្គម ក៏ដូចជាតាមរយៈការផ្សព្វផ្សាយព័ត៌មានអំពីការលេងសប្បាយរបស់ប្រជាពលរដ្ឋនៅទូទាំងប្រទេស។
ជារៀងរាល់ឆ្នាំ ក្នុងអំឡុងបុណ្យទានធំៗ ក៏ដូចជាពិធីបុណ្យចូលឆ្នាំខ្មែរ ប្រជាពលរដ្ឋភាគច្រើនតែងតែចាកចេញពីរាជធានីភ្នំពេញទៅជួបជុំក្រុមគ្រួសារនៅស្រុកកំណើត និងខ្លះទៀតដើរលេងកម្សាន្តនៅរាជធានីភ្នំពេញ ជាពិសេសនៅតំបន់រមណីយដ្ឋានវត្តភ្នំ ដែលមានរៀបចំកម្មវិធីជាច្រើនហូហែរ ដូចជាការលេងល្បែងប្រជាប្រិយ៍ ការប្រគំតន្រ្តី និងការលេងបាញ់ទឹកជាដើម៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
