នាយករដ្ឋមន្ត្រីស្លូវ៉ាគី លោក រ៉ូប៊ឺត ហ្វីខូ (Robert Fico) បាននិយាយកាលពីថ្ងៃអង្គារ (១៦ មេសា) ថា ហានិភ័យនៃសង្គ្រាមពិភពលោកនឹងកើនឡើង ប្រសិនបើអ៊ុយក្រែន ក្លាយជាផ្នែកមួយនៃអង្គការណាតូ (NATO)។ ការទទួលយកប្រទេសថ្មីចូលទៅក្នុងសម្ព័ន្ធភាពយោធាដែលដឹកនាំដោយសហរដ្ឋអាមេរិកនេះ តម្រូវឱ្យមានការយល់ព្រមជាឯកច្ឆ័ន្ទពីសមាជិកបច្ចុប្បន្នចំនួន ៣២ ប្រទេសរបស់ខ្លួន។

លោក ហ្វីខូ បាននិយាយថា ប្រសិនបើអ៊ុយក្រែនត្រូវបានអញ្ជើញឱ្យចូលរួមក្នុងអង្គការណាតូ សភារបស់ប្រទេសស្លូវ៉ាគីនឹងមិនផ្តល់សច្ចាប័នលើសន្ធិសញ្ញាចូលជាសមាជិកនោះទេ។ នាយករដ្ឋមន្ត្រីស្លូវ៉ាគីរូបនេះបានសង្កត់ធ្ងន់ថាខ្លួននឹងមិនចុះចាញ់នឹងសម្ពាធខាងក្រៅណាមួយឡើយ។

គេហទំព័រព័ត៌មានស្លូវ៉ាគី ណូវីនី (Noviny) បានដកស្រង់សម្ដីលោក ហ្វីខូ ដែលបានពន្យល់ថា «ស្លូវ៉ាគីត្រូវការអ៊ុយក្រែនដែលអព្យាក្រឹត។ ផលប្រយោជន៍របស់ប្រទេសនឹងត្រូវបានគំរាមកំហែង ប្រសិនបើអ៊ុយក្រែនក្លាយជារដ្ឋសមាជិកណាតូ ពីព្រោះនោះគឺជាមូលដ្ឋាននៃជម្លោះពិភពលោកដ៏ធំមួយ»។

ស្លូវ៉ាគី រួមជាមួយនឹងប្រទេសជិតខាងហុងគ្រី បានព្រមានថាសហភាពអឺរ៉ុប មិនគួរត្រូវបានអូសចូលទៅក្នុងជម្លោះរវាងរុស្ស៊ី និងអ៊ុយក្រែនទេ ហើយបានទទូចលើដំណោះស្រាយការទូត។ បន្ទាប់ពីក្លាយជានាយករដ្ឋមន្ត្រីក្នុងខែតុលា ឆ្នាំ២០២៣ លោក ហ្វីខូ បានបដិសេធការសម្រេចរបស់រដ្ឋាភិបាលមុនក្នុងការបញ្ជូនអាវុធទៅទីក្រុងគីវ ហើយលោកក៏ប្រឆាំងយ៉ាងខ្លាំងដែរចំពោះការបញ្ជូនទាហានណាតូទៅអ៊ុយក្រែន។

អ៊ុយក្រែនបានដាក់ពាក្យជាផ្លូវការដើម្បីចូលរួមជាមួយអង្គការណាតូ កាលពីខែកញ្ញា ឆ្នាំ២០២២។ ទោះបីជារដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បានបញ្ជាក់ជាថ្មីក្នុងខែនេះថា អ៊ុយក្រែន «នឹងក្លាយជាសមាជិកនៃអង្គការណាតូ» នៅពេលណាមួយនាពេលអនាគតក៏ដោយ ក៏រហូតមកដល់ពេលនេះ សម្ព័ន្ធយោធាបានបដិសេធមិនធ្វើទៅតាមកាលវិភាគជាក់លាក់ ឬផ្តល់ផ្លូវច្បាស់លាស់សម្រាប់ការចូលរួមជាសមាជិករបស់ទីក្រុងគីវឡើយ៕