ទីភ្នាក់ងារភ្នំភ្លើងរបស់ប្រទេសឥណ្ឌូណេស៊ី បាននិយាយនៅថ្ងៃពុធ (១៧ មេសា) នេះថា មនុស្សយ៉ាងហោចណាស់ ៨០០ នាក់នៅក្នុងខេត្ត ស៊ូឡាវ៉េស៊ី (Sulawesi) ភាគខាងជើងរបស់ប្រទេស ត្រូវបានជម្លៀសចេញបន្ទាប់ពីការផ្ទុះជាច្រើនដងនៃភ្នំភ្លើង រូអាំង (Ruang) របស់តំបន់នេះ ដែលអស់រយៈពេលជាច្រើនថ្ងៃបានបញ្ចេញកម្អែភ្នំភ្លើង និងសំណុំផេះទៅលើមេឃ។
ភ្នំភ្លើងដែលស្ថិតនៅលើកោះ រូអាំង ដែលមានអ្នករស់នៅប្រហែល ៨៣៨ នាក់ បានផ្ទុះឡើងច្រើនជាងបីដងចាប់តាំងពីថ្ងៃអង្គារមក។ លោកស្រី ហើរ៉ូនីងត្យ៉ាស ដេស៊ី ភួរណាម៉ាសារី (Heruningtyas Desi Purnamasari) មន្ត្រីនៅមជ្ឈមណ្ឌលសម្រាប់គ្រោះមហន្តរាយភ្នំភ្លើង និងភូគព្ភសាស្ត្រ (PVMBG) របស់ឥណ្ឌូនេស៊ី បានប្រាប់សារព័ត៌មានរ៉យទ័រថា អាជ្ញាធរបានបង្កើនកម្រិតប្រកាសអាសន្នដល់កម្រិតខ្ពស់បំផុតទីពីរ បន្ទាប់ពីសកម្មភាពភ្នំភ្លើងបានកើនឡើង។
លោកស្រីនិយាយថា ការផ្ទុះភ្នំភ្លើងត្រូវបានបង្កឡើងដោយការរញ្ជួយដីនាពេលថ្មីៗនេះនៅលើកោះនេះ ដោយភ្នំភ្លើងបានបញ្ចេញផ្សែងដ៏គ្រោះថ្នាក់ និងបំផ្ទុះ «សំណុំផេះក្តៅ» ដែលមានកម្ពស់រហូតដល់ ១,៨ គីឡូម៉ែត្រទៅលើមេឃ។ ប្រទេសឥណ្ឌូណេស៊ី ស្ថិតនៅលើអ្វីដែលគេហៅថា «តំបន់កងភ្លើងប៉ាស៊ីហ្វិក» ដែលជាតំបន់នៃសកម្មភាពរញ្ជួយដីខ្ពស់៕