ប្រព័ន្ធផ្សព្វផ្សាយរដ្ឋបាននិយាយថា ប្រទេសចិន នឹងធ្វើសមយុទ្ធការពារដែនអាកាស និងសមយុទ្ធបាញ់គ្រាប់ពិតនៅជិតព្រំដែនរបស់ខ្លួនជាមួយមីយ៉ាន់ម៉ា ចាប់ពីថ្ងៃពុធ (មេសា) នេះនៅក្នុងសមយុទ្ធជុំទីពីរនៃខែនេះ ខណៈដែលការប្រយុទ្ធគ្នារវាងរបបសឹកដែលកំពុងកាន់អំណាចរបស់សហភាពមីយ៉ាន់ម៉ា និងកងកម្លាំងឧទ្ទាមកាន់តែខ្លាំងក្លា។
សមយុទ្ធនេះធ្វើឡើងបន្ទាប់ពីមានការកើនឡើងគួរឱ្យកត់សម្គាល់នៃជម្លោះកាលពីសប្តាហ៍មុន នៅពេលដែលកងកម្លាំងឧទ្ទាមដណ្តើមបានភូមិ មីយ៉ាវ៉ាឌី (Myawaddy) របស់មីយ៉ាន់ម៉ា ដែលជាច្រកពាណិជ្ជកម្មដ៏សំខាន់នៅជិតព្រំដែនថៃ ដោយជំរុញឱ្យមានលំហូរជនភៀសខ្លួនចូលទៅក្នុងប្រទេសថៃ។
ទូរទស្សន៍រដ្ឋ CCTV បាននិយាយថា សមយុទ្ធនៅសប្តាហ៍នេះ ដោយបញ្ជាការខាងត្បូងរបស់ប្រទេសចិន បានបង្កើតឡើងជាផ្នែកនៃលំហាត់ហ្វឹកហ្វឺនប្រចាំឆ្នាំ ដោយមិនសំដៅទៅលើការប្រយុទ្ធគ្នានៅក្នុងប្រទេសជិតខាងនោះទេ។ កងទ័ពរបស់ប្រទេសចិន តែងតែត្រៀមខ្លួនដើម្បីឆ្លើយតបទៅនឹងភាពអាសន្ន ហើយនឹង «ការពារយ៉ាងម៉ឺងម៉ាត់នូវអធិបតេយ្យភាពជាតិ ស្ថិរភាពព្រំដែន និងសុវត្ថិភាពនៃជីវិត និងទ្រព្យសម្បត្តិរបស់ប្រជាជន»។
រដ្ឋាភិបាលដែលគ្រប់គ្រងដោយយោធារបស់មីយ៉ាន់ម៉ា បានប្រយុទ្ធនឹងការបះបោរនៅលើសមរភូមិមុខជាច្រើនចាប់តាំងពីការផ្តួលរំលំរដ្ឋាភិបាលជាប់ឆ្នោតក្នុងឆ្នាំ២០២១ ប៉ុន្តែការបរាជ័យនៅក្នុងតំបន់ព្រំដែនចាប់តាំងពីខែតុលា ឆ្នាំមុន បានធ្វើឱ្យខ្លួនបាត់បង់ការគ្រប់គ្រងលើទឹកដីជាប់ព្រំដែនបង់ក្លាដែស ចិន និងឥណ្ឌា៕