អ្នកជំនាញបានប្រាប់ប្រព័ន្ធផ្សព្វផ្សាយ CNA ថា ការវាយប្រហារដោយចាក់នឹងកាំបិតចំនួន ២កន្លែង ដែលបានកើតឡើងថ្មីៗនេះ ក្នុងរយៈពេល ៣ថ្ងៃ នៅទីក្រុងស៊ីដនី ប្រទេសអូស្ត្រាលី គឺជាព្រឹត្តិការណ៍ខុសគ្នាឆ្ងាយណាស់ ដោយអ្នកវាយប្រហារម្នាក់ហាក់ ដូចជាមានបំណងសំដៅទៅលើស្ត្រី ខណៈម្នាក់ទៀតត្រូវបានសង្ស័យថា ជាពួកជ្រុលនិយមខាងសាសនា។ ជាមួយគ្នានេះ អ្នកជំនាញក៏បានពិចារណាផងដែរអំពីបញ្ហាទាំងនេះ ជុំវិញមនោគមវិជ្ជាស្អប់ស្ពើមស្ត្រី ដែលជាវប្បធម៌ «មិនអាចទទួលយកដៃគូផ្ទុយភេទ» និងជំងឺផ្លូវចិត្ត នៅក្នុងប្រទេសអូស្ត្រាលី ខណៈពេលដែលមានការប្រុងប្រយ័ត្នប្រឆាំងនឹងការរំពឹងទុកអំពីការកើតមានឧប្បត្តិហេតុនេះ។
គួរបញ្ជាក់ថា កាលពីរសៀលថ្ងៃសៅរ៍ ទី១៣ ខែមេសា ជនដៃដល់វ័យ ៤០ឆ្នាំម្នាក់ បានធ្វើការវាយប្រហារបង្ហូរឈាមដោយការចាក់នឹងកាំបិតមិនរើសមុខ នៅមជ្ឈមណ្ឌលលក់ទំនិញ Bondi។ ជនល្មើសឈ្មោះ Joel Cauchi បានចាក់សម្លាប់មនុស្ស ៦នាក់ និងរបួសយ៉ាងហោចណាស់ ១២នាក់ ក្នុងនោះរួមទាំងទារកម្នាក់ផងដែរ មុនពេលរូបគេត្រូវបាននគរបាលបាញ់សម្លាប់។ នគរបាលអូស្ត្រាលីបាននិយាយ កាលពីថ្ងៃចន្ទថា ជនល្មើស Cauchi ដែលមានប្រវត្តិមានបញ្ហាសុខភាពផ្លូវចិត្ត ប្រហែលជាបានកំណត់គោលដៅលើស្ត្រី ព្រោះអ្នកស្លាប់ និងរបួសភាគច្រើនជាស្ត្រី។ នៅថ្ងៃចន្ទ (ទី១៥ ខែមេសា) ទីក្រុងនេះបានកើតមានម្តងទៀតនូវការវាយប្រហារដោយកាំបិតដ៏ធំមួយទៀត ដោយលើកនេះអំឡុងពេលផ្សាយផ្ទាល់កម្មវិធីបុណ្យនៅព្រះវិហារគ្រិស្តសាសនា។ យ៉ាងហោចមនុស្ស ៤នាក់បានរងរបួស ក្នុងនោះរួមមានសង្ឃជាន់ខ្ពស់ ១អង្គផងដែរ ហើយជនសង្ស័យភេទប្រុសអាយុ ១៦ឆ្នាំម្នាក់ ត្រូវបានចាប់ខ្លួន។ នគរបាលអូស្ត្រាលីបានចាត់ទុកការវាយប្រហារនេះថា ជាអំពើភេរវកម្មដែលបង្កឡើងដោយក្រុមជ្រុលនិយមខាងសាសនា ដោយជនសង្ស័យហាក់ដូចជាបានធ្វើសកម្មភាពតែម្នាក់ឯង។
លោកស្រីវេជ្ជបណ្ឌិត Samara McPhedran សាស្ត្រាចារ្យរងកិត្តិយសនៅសាលាច្បាប់នៃសាកលវិទ្យាល័យ Queensland បាននិយាយថា សំណួរចាំបាច់ជាច្រើនត្រូវបានលើកឡើងថា តើការវាយប្រហារលើកទី២ គឺជាឧក្រិដ្ឋកម្មត្រាប់តាម ឬយ៉ាងណា។ ដោយកត់សម្គាល់ថា ឧក្រិដ្ឋកម្មរបស់ជនល្មើស Cauchi អាចមានទាក់ទងនឹងជំងឺវិកលចរិក ដែលរូបគេមិនបានព្យាបាលនោះ លោកស្រីបានប្រាប់ប្រព័ន្ធផ្សព្វផ្សាយ CNA ថា៖ «តែយ៉ាងណាក្ដី ក្នុងករណីនេះ វាហាក់ដូចជាមិនមានទំនាក់ទំនងអ្វីទាំងអស់ រវាងឧប្បត្តិហេតុទាំង២ នេះ ហើយថា ហេតុការណ៍នេះ កើតឡើងក្នុងពេលវេលាចៃដន្យធម្មតា»។
ចំណែកសាស្ត្រាចារ្យរងម្នាក់ទៀតផ្នែកយុត្តិធម៌ និងឧក្រិដ្ឋកម្ម នៅសកលវិទ្យាល័យ Bond លោកវេជ្ជបណ្ឌិត Terry Goldsworthy បានប្រាប់ស្រដៀងគ្នាថា ការវាយប្រហារទាំង២ គឺជា «ព្រឹត្តិការណ៍ខុសគ្នាឆ្ងាយណាស់» ហើយថា ហេតុផលជំរុញចិត្តរបស់ជនដៃដល់ Cauchi «នៅតែត្រូវបានកំណត់ក្នុងកម្រិតណាមួយ»៕