គណបក្សប្រឆាំងរបស់ប្រទេសឥណ្ឌាប្រឈមមុខនឹងបញ្ហាប្រឈមដ៏ធំ ខណៈដែលសម្ព័ន្ធភាពដ៏ច្រើនរបស់ពួកគេ ដែលមានជាង ២០គណបក្ស ត្រូវតទល់នឹងឥទ្ធិពលដ៏ធំធេងនៃគណបក្សកាន់អំណាចរបស់នាយករដ្ឋមន្ត្រីលោក Narendra Modi។

គណបក្សសម្ព័ន្ធភាពរួមគ្នាអភិវឌ្ឍន៍ជាតិឥណ្ឌា (INDIA) សង្ឃឹមថា នឹងធ្វើមានការភ្ញាក់ផ្អើល ដោយការផ្ដល់លទ្ធផលផ្ទុយពីការព្យាករណ៍ ដែលថា គណបក្ស Bharatiya Janata Party (BJP) របស់លោក Modi នឹងទទួលបានជ័យជម្នះយ៉ាងស្រួលៗនៅក្នុងការបោះឆ្នោតរយៈពេល ៦សប្តាហ៍ ដែលត្រូវចាប់ផ្តើមពីថ្ងៃសុក្រ (ទី១៩ ខែមេសា) នេះ។

គួររម្លឹកថា អំឡុងការបោះឆ្នោតជាតិចុងក្រោយក្នុងឆ្នាំ២០១៩ គណបក្សមកពីសម្ព័ន្ធភាព បានឈ្នះមិនដល់១ភាគ៥នៃអាសនៈនៅក្នុងសភាជាន់ទាប ដោយឈ្នះ ៩១អាសនៈ ក្នុងចំណោមអាសនៈចំនួន៥៤៣ ឬ ១៧ភាគរយ ពោលគឺនៅឆ្ងាយណាស់ពីគណបក្ស BJP ដែលមានអាសនៈចំនួន ៣០៣ ឬ ៥៥ភាគរយ។

យ៉ាងណាក្ដី ក្នុងចំណោមគណបក្សប្រឆាំងទាំងនោះ ក៏មានបេក្ខជនដ៏លេចធ្លោមួយរូបនៃគ្រួសារដែលគ្រប់ដណ្ដប់លើនយោបាយឥណ្ឌាអស់រយៈពេលជិត ៧ទសវត្សរ៍មកហើយ គឺលោក Rahul Gandhi ដែលមានអាយុ ៥៣ឆ្នាំ ដោយពេលនេះ រូបលោកបានតស៊ូដើម្បីគេចចេញពីរូបភាពនៃការមានឥទ្ធិពលពីគ្រួសារនេះ។

ក្រោមការគ្រប់គ្រងរបស់លោក Gandhi គណបក្ស Congress ដែលជាប្រពៃណីបានអះអាងថា តំណាងឲ្យជំនឿទាំងអស់ ក្នុងប្រទេសឥណ្ឌាដែលមានសាសនាតាមរដ្ឋធម្មនុញ្ញ បានរងបរាជ័យ ២លើក ដោយសារគណបក្ស BJP របស់លោក Modi។ Congress ជាគណបក្សប្រឆាំងតែមួយគត់ដែលមានវត្តមាននៅឥណ្ឌា បានឈ្នះ ៥២អាសនៈ នៅសភាជាន់ទាប ក្នុងការបោះឆ្នោតឆ្នាំ២០១៩ ដែលជាគណបក្សធំបំផុតទី២ ប៉ុន្តែមានសំឡេងមិនដល់ ១០ភាគរយ នៅសភា។

លោក Gandhi ដែលជាសមាជិកសភា ៤អាណត្តិ ត្រូវបានរំខានដោយសំណុំរឿងព្រហ្មទណ្ឌជាច្រើន ដែលប្តឹងរូបលោកដោយសមាជិករបស់គណបក្ស BJP ក្នុងនោះរួមទាំងការផ្តន្ទាទោសពីបទបរិហារកេរ្តិ៍ដែលបានឃើញថា រូបលោកត្រូវបានដកសិទ្ធិពីសភាមួយរយៈ កាលពីឆ្នាំមុន។ លោក Gandhi ដឹងច្បាស់ថា ការយកជ័យជម្នះលើគណបក្ស BJP ទាមទារឲ្យក្រុមចម្រុះឈរជាមួយគ្នា។ ដូច្នេះ រូបលោកបានប្រុងប្រយ័ត្នមិនឲ្យសម្ព័ន្ធភាពឃ្លាតឆ្ងាយពីគ្នា ដោយអះអាងថា លោកនឹងឡើងកាន់តំណែងជានាយករដ្ឋមន្ត្រី ប្រសិនបើក្រុមរបស់លោកឈ្នះការបោះឆ្នោតលើកនេះ៕