​បាល់ទាត់៖ ​ខ្សែប្រយុទ្ធ​ជើងចាស់​បារាំង Andre-Pierre Gignac ធ្វើបាន​ ៣គ្រាប់​ម្នាក់ឯង​ឱ្យ​បារាំង​តាម​ពីក្រោយ ៣​ដង​យកឈ្នះអាហ្វ្រិក​ខាងត្បូង ៤-៣ បន្ត​ក្តីសង្ឃឹម​នៅ​ព្រឹត្តិការណ៍​អូឡាំពិក​ទីក្រុង​តូ​ក្យូ​។ ​បន្ទាប់ពី​ចាញ់​ប្រកួត​ដំបូង​នៅក្នុង​ពូ​ល A បារាំង​ត្រូវបាន​អាហ្វ្រិក​ខាងត្បូង​នាំមុខ ៣​លើក​នៅ​វគ្គ​ទី២ បន្ទាប់ពី​វគ្គ​ទី១ គ្មាន​ក្រុម​ណា​រកបាន​គ្រាប់​បាល់​។

​អតីត​ខ្សែប្រយុទ្ធ Marseille, Andre-Pierre Gignac ដែល​បច្ចុប្បន្ន​លេង​នៅ​ក្លិប​ម៉ិ​ក​ស៊ិ​ក Tigres ក្លាយជា​វិ​រ​បុរស​របស់​ក្រុម​បារាំង​ ដោយ​រកបាន​គ្រាប់​បាល់​តាម​ស្មើ ៣លើក​ផ្ទួនៗ មុនពេល​ដែល Teji Savanier ជា​អ្នកសំរេច​គ្រាប់​បាល់​ជ័យជំនះ​ឱ្យ​ក្រុម​បារាំង​នៅ​នាទី​ទី៩០+២​។ ​នៅក្នុង​ពូ​ល A នេះ​ជប៉ុន​ឈ្នះ ២ប្រកួត​ជាប់​គ្នា​បន្ទាប់ពី​ឈ្នះ​ម៉ិ​ក​ស៊ិ​ក ២-១ ម្សិលមិញ​នេះដែរ​មាន ៦ពិន្ទុ​ពេញ​កក់​កៅអី​នៅ​វគ្គ​បន្ត ​ខណៈ​បារាំង និង​ម៉ិ​ក​ស៊ិ​កមាន ៣ពិន្ទុ​ដូចគ្នា​។​ ​នៅក្នុង​ពូ​ល B វិញ​ក្រោយ ២​ប្រកួត​ក្រុម​ទាំង​ ៤ មាន ៣ពិន្ទុ​ដូចគ្នា បន្ទាប់ពី​ហុង​ឌុយ​រ៉ា​ស​យកឈ្នះ​នូ​វែ​ហ្ស៊ី​ឡង់ ៣-២ និងកូរ៉េខាងត្បូង​យកឈ្នះ​រ៉ូ​ម៉ា​នី ៤-០។

​​នៅក្នុង​ពូ​ល C អេ​ស្ប៉ា​ញ​យកឈ្នះ​អូស្ត្រាលី ១-០ ដោយ Mikel Oyarzabal ខណៈ​អា​ហ្ស​ង់​ទីន​យកឈ្នះ​អេ​ហ្ស៊ីប ១-០​។ ពូ​ល C នេះ​អេ​ស្ប៉ា​ញ​ឈរលើ​គេ​មាន ៤ពិន្ទុ ​ខណៈ​អូស្ត្រាលី និង​អា​ហ្ស​ង់​ទីន​មាន ៣ពិន្ទុ​ដូចគ្នា​។​ ​ចំណែក​ពូ​ល D ម្ចាស់​មេដាយ​មាស ២០១៦ ប្រេ​ស៊ី​ល​ត្រូវ​រង់ចាំ​ដល់​ប្រកួត​ចុងក្រោយ​ដើម្បី​ដឹងថា​ឡើង​ជុំ​បន្ត​រឺ​អត់ ក្រោយ​បាន​ត្រឹម​ស្មើ​កូ​ឌី​វ័រ ០-០ ម្សិលមិញ ស្រប​ពេល​អាល្លឺម៉ង់​យកឈ្នះ​អារ៉ាប៊ីសាអ៊ូឌីត ៣-២​។ ​ប្រេ​ស៊ី​ល​ឈរលើ​គេ​ក្នុង​ពូ​ល D នេះ​មាន ៤ពិន្ទុ​ស្មើគ្នា​ជាមួយ​កូ​ឌី​វ័រ ខណៈ​អាល្លឺម៉ង់​លេខ៣ មាន ៣ពិន្ទុ និង​អារ៉ាប៊ីសាអ៊ូឌីត ០ពិន្ទុ​។ វិញ្ញាសា​បាល់ទាត់​បុរស​នៅ​អូឡាំពិក​ទីក្រុង​តូ​ក្យូ​ នឹង​បញ្ចប់​វគ្គ​វិលជុំ​ក្នុង​ពូ​ល​នៅ​ថ្ងៃ​ពុធ​៕

​អត្ថបទ​៖​នាង សុភា​វុ​ធ