យន្តហោះល្បាតរបស់កងទ័ពជើងទឹកអាមេរិកមួយគ្រឿង បានហោះកាត់ច្រកសមុទ្រតៃវ៉ាន់ដ៏រសើប នៅថ្ងៃពុធ (ទី១៧ ខែមេសា) នេះ ពោលគឺត្រឹមតែប៉ុន្មានម៉ោងបន្ទាប់ពីការសន្ទនា រវាងប្រមុខការពារជាតិចិន និងសហរដ្ឋអាមេរិក ដែលក្នុងនោះ ទីក្រុងប៉េកាំង បានព្រមានក្រុងវ៉ាស៊ីនតោនអំពីស្ថានភាពដ៏ធ្ងន់ធ្ងរនៃបញ្ហាកោះតៃវ៉ាន់។
ប្រទេសចិនទាមទារអធិបតេយ្យភាពលើកោះតៃវ៉ាន់ដែលគ្រប់គ្រងតាមបែបប្រជាធិបតេយ្យ ហើយនិយាយថា ខ្លួនមានយុត្តាធិការលើច្រកសមុទ្រនេះ។ កោះតៃវ៉ាន់ និងអាមេរិកជំទាស់ការលើកឡើងនោះ ដោយនិយាយថា ច្រកសមុទ្រតៃវ៉ាន់ គឺជាផ្លូវទឹកអន្តរជាតិ។
កងនាវាចរណ៍ទី៧ របស់កងទ័ពជើងទឹកសហរដ្ឋអាមេរិក បានអះអាងថា យន្តហោះល្បាតដែនសមុទ្រ P-8A Poseidon និងឈ្លបយកការណ៍ ដែលត្រូវបានប្រើសម្រាប់បេសកកម្មប្រឆាំងនាវាមុជទឹកផងដែរនោះ បានហោះពីខាងលើច្រកសមុទ្រ ក្នុងដែនអាកាសអន្តរជាតិ។
ពុំមានប្រតិកម្មភ្លាមៗពីប្រទេសចិនទេ។ លើកចុងក្រោយ ដែលកងទ័ពជើងទឹកអាមេរិក បានប្រកាសថា យន្តហោះ Poseidon បានហោះឆ្លងកាត់ច្រកសមុទ្រ គឺនៅក្នុងខែធ្នូ ហើយយោធាចិនបាននិយាយថា ខ្លួនបានបញ្ជូនយន្តហោះចម្បាំងទៅត្រួតពិនិត្យ និងព្រមានយន្តហោះនោះ៕