ឯកអគ្គរដ្ឋទូតអាមេរិកប្រចាំអង្គការសហប្រជាជាតិ បាននិយាយកាលពីថ្ងៃពុធថា សហរដ្ឋអាមេរិក និងសម្ព័ន្ធមិត្ត កំពុងពិភាក្សាអំពីជម្រើស «ទាំងក្នុង និងក្រៅប្រព័ន្ធអង្គការសហប្រជាជាតិ» ដើម្បីបង្កើតយន្តការថ្មីមួយសម្រាប់តាមដានប្រទេសកូរ៉េខាងជើងជុំវិញកម្មវិធីអាវុធនុយក្លេអ៊ែររបស់ខ្លួន។

កាលពីខែមុន ប្រទេសរុស្ស៊ី បានវេតូលើសេចក្តីសម្រេចរបស់អង្គការសហប្រជាជាតិ ក្នុងចំណាត់ការមួយ ដែលបានលុបចោលការត្រួតពិនិត្យប្រកបដោយប្រសិទ្ធភាពដោយអ្នកជំនាញនៃក្រុមប្រឹក្សាសន្តិសុខរបស់អង្គការសហប្រជាជាតិ ដាក់ទណ្ឌកម្មប្រឆាំងនឹងកូរ៉េខាងជើងដែលបានជំរុញឲ្យមានការចោទប្រកាន់លោកខាងលិចថា ទីក្រុងមូស្គូ កំពុងធ្វើសកម្មភាព ដើម្បីការពារការទិញអាវុធពីកូរ៉េខាងជើង ដើម្បីធ្វើ     សង្គ្រាម នៅអ៊ុយក្រែន។

ឯកអគ្គរដ្ឋទូតអាមេរិក លោកស្រី Linda Thomas-Greenfield បានប្រាប់សន្និសីទសារព័ត៌មាននៅទីក្រុងសេអ៊ូលថា៖«ខ្ញុំទន្ទឹងរង់ចាំការចូលរួមជាមួយកូរ៉េខាងត្បូង និងជប៉ុន គឺ(ប្រទេសទាំងពីរ) មានគំនិតដូចគ្នាទៅលើការព្យាយាមបង្កើតជម្រើសទាំងនៅក្នុងUN ក៏ដូចជានៅខាងក្រៅUN។ ចំណុចនៅទីនេះ គឺថា យើងមិនអាចអនុញ្ញាតឲ្យមានការងារ ដែលក្រុមអ្នកជំនាញកំពុងធ្វើនោះ ត្រូវបានលុបចោលទេ។

លោកស្រីThomas-Greenfield មិនបានផ្តល់ព័ត៌មានលម្អិតជាក់លាក់អំពីការពិភាក្សារបស់សហរដ្ឋអាមេ    រិកជាមួយសម្ព័ន្ធមិត្ត និងដៃគូផ្សេងទៀត រួមទាំងថាតើរបបត្រួតពិនិត្យជម្រើសមួយ ទំនងជាត្រូវបានបង្កើតឡើងតាមរយៈមហាសន្និបាតអង្គការសហប្រជាជាតិ ឬជាមួយអង្គភាពឯករាជ្យ នៅខាងក្រៅអង្គការសហប្រជាជាតិ។

លោកស្រី បានជួបជាមួយរដ្ឋមន្ត្រីការបរទេសកូរ៉េខាងត្បូង លោក Cho Tae-yul កាលពីថ្ងៃចន្ទ ហើយពួកគេ បានពិភាក្សាអំពី«ជំហានបន្ទាប់ដែលមិនបានបញ្ជាក់ច្បាស់លាស់ ដើម្បីធានាឲ្យមានការបន្តការរាយការណ៍ដោយឯករាជ្យ និងត្រឹមត្រូវអំពី«សកម្មភាពអភិវឌ្ឍន៍អាវុធខុសច្បាប់របស់ប្រទេសកូរ៉េខាងជើង នេះបើយោងតាមការិយាល័យរបស់លោកស្រី។