របាយការណ៍របស់អង្គការសហប្រជាជាតិដែលបានចេញផ្សាយ នៅថ្ងៃពុធ (១៧ មេសា) នេះ បានឲ្យដឹងថា វិសមភាពផ្នែកលទ្ធភាពទទួលបានសេវាថែទាំសុខភាពប្រកបដោយគុណភាព បានធ្វើឲ្យស្ត្រីមកពីសហគមន៍ក្រីក្រ ងាយនឹងស្លាប់ដោយសារការមានគភ៌ ឬអំឡុងពេលសម្រាល។
របាយការណ៍ដោយ UNFPA ដែលជាទីភ្នាក់ងារសុខភាពផ្លូវភេទ និងសុខភាពបន្តពូជរបស់អង្គការសហប្រជាជាតិ បាននិយាយថា មិនមានការថយចុះនោះឡើយ ពាក់ព័ន្ធនឹងមរណភាពមាតា គិតចាប់តាំងពីឆ្នាំ២០១៦ មក ហើយអត្រានោះកំពុងកើនឡើងនៅក្នុងប្រទេសមួយចំនួន។
លោកស្រីវេជ្ជបណ្ឌិត Natalia Kanem នាយកប្រតិបត្តិរបស់ទីភ្នាក់ងារ UNFPA បាននិយាយថា វិសមភាព គឺ «ច្បាស់ណាស់ពិតជាបានសម្លាប់» ស្ត្រីអំឡុងពេសម្រាលកូន នៅជុំវិញពិភពលោក ហើយថា ស្ត្រីនៅក្នុងប្រទេសដែលមានប្រព័ន្ធសុខភាពផុយស្រួយ គឺទំនងជាមានអាត្រាស្លាប់ ១៣០ដង ដោយសារផលវិបាកនៃការមានគភ៌ និងការសម្រាលកូន ជាងស្ត្រីក្នុងប្រទេសដែលងាយទទួលបានលទ្ធភាពថែទាំផ្នែកសម្ភព អំឡុងពេលត្រូវសង្គ្រោះបន្ទាន់។
របាយការណ៍បានរកឃើញថា ជាងពាក់កណ្តាលនៃអាត្រាមរណភាពមាតាដែលអាចការពារបានទាំងអស់ ត្រូវបានប៉ាន់ប្រមាណថា នឹងកើតឡើងនៅក្នុងប្រទេសដែលមានវិបត្តិមនុស្សធម៌ និងជម្លោះ ដោយតួលេខនេះមានចំនួនអ្នកស្លាប់ ៥០០នាក់ក្នុងមួយថ្ងៃ។
របាយការណ៍បានរកឃើញថា ស្ត្រីមានដើមកំណើតអាហ្វ្រិក នៅតំបន់អាមេរិក ទំនងជាមានអាត្រាស្លាប់ខ្ពស់ពេលសម្រាលកូន ជាងស្ត្រីជនជាតិស្បែកស។ នៅសហរដ្ឋអាមេរិក អត្រានោះខ្ពស់ជាងមធ្យមភាគជាតិដល់ទៅ ៣ដង៕