អធិការបតីអាល្លឺម៉ង់លោក អូឡាហ្វ សូល (Olaf Scholz) បាននិយាយកាលពីថ្ងៃអង្គារថា លោកបានជំរុញឲ្យលោក ស៊ី ជីនពីង (Xi Jinping) ជំរុញសម្ព័ន្ធមិត្តរុស្ស៊ីឲ្យបញ្ចប់សង្គ្រាម «គ្មានន័យ» របស់ខ្លួននៅក្នុងប្រទេសអ៊ុយក្រែន ហើយថា ប្រធានាធិបតីចិន បានយល់ព្រមគាំទ្រសន្និសីទសន្តិភាព នៅប្រទេស ស្វ៊ីស។
លោកសូល បាននិយាយបន្ទាប់ពីកិច្ចប្រជុំជាមួយលោកស៊ី នៅឯវិមានរដ្ឋ Diaoyutai នៅទីក្រុងប៉េកាំងកាលពីថ្ងៃអង្គារថា៖«ពាក្យសម្តីរបស់ចិន មានទម្ងន់នៅក្នុងប្រទេសរុស្ស៊ី»។
លោកបាននិយាយនៅលើប្រព័ន្ធផ្សព្វផ្សាយសង្គម X ថា៖«ដូច្នេះខ្ញុំបានស្នើឲ្យលោកប្រធានាធិបតីស៊ី មានឥទ្ធិពលលើប្រទេសរុស្ស៊ី ដើម្បីឲ្យុលោកពូទីនបញ្ចប់យុទ្ធនាការគ្មានន័យរបស់លោក គឺដកកងទ័ពរបស់លោក និងបញ្ចប់សង្រ្គាមដ៏អាក្រក់នេះ»។
លោកបាននិយាយថា លោកស៊ី បានយល់ព្រមគាំទ្រសន្និសិទសន្តិភាព នៅប្រទេសស្វ៊ីស ដែលនឹងត្រូវធ្វើឡើង នៅខែមិថុនា ដោយមិនមានរុស្ស៊ីចូលរួមនោះទេ។
ដោយស្វាគមន៍ការគាំទ្ររបស់លោកស៊ី ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី ( Volodymyr Zelenksy) បានឆ្លើយតបនៅលើបណ្តាញសង្គម Xថា ប្រទេសចិន អាចជួយផ្តល់ «សន្តិភាព» សម្រាប់ប្រទេសរបស់ខ្លួន ដោយដើរតួនាទីយ៉ាងសកម្ម នៅក្នុងសន្និសីទអន្តរជាតិ។