ការិយាល័យសិទ្ធិមនុស្សរបស់អង្គការសហប្រជាជាតិកាលពីថ្ងៃអង្គារ បានអំពាវនាវឲ្យអ៊ីស្រាអែលបញ្ឈប់ការគាំទ្ររបស់ខ្លួនចំពោះការវាយប្រហារដោយអ្នកតាំងលំនៅនៅតំបន់វេសបែង( West Bank)ដែលបានឃើញការកើនឡើងនៃការវាយឆ្មក់ដោយអ៊ីស្រាអែល ចាប់តាំងពីការវាយប្រហារដែលដឹកនាំដោយក្រុមហាម៉ាស កាលពីថ្ងៃទី៧ ខែតុលា។
ការអំពាវនាវនេះ បានធ្វើឡើងមួយថ្ងៃបន្ទាប់ពីអ្នកតាំងលំនៅរបស់អ៊ីស្រាអែល បានបាញ់សម្លាប់ជនជាតិប៉ាឡេស្ទីនពីរនាក់ នៅតំបន់វេសបែងកាលពីថ្ងៃចន្ទ បន្ទាប់ពីកងកម្លាំងអ៊ីស្រាអែល បានសម្លាប់ក្មេងជំទង់ប៉ាឡេស្ទីនម្នាក់ ក្នុងអំឡុងពេលការវាយឆ្មក់របស់យោធា។
លោកស្រី Ravina Shamdasani អ្នកនាំពាក្យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននិយាយថា៖«អ៊ីស្រាអែលក្នុងនាមជាប្រទេសកាន់អំណាច ត្រូវតែចាត់វិធានការទាំងអស់ នៅក្នុងអំណាចរបស់ខ្លួន ដើម្បីស្តារ និងធានាសណ្តាប់ធ្នាប់សាធារណៈ និងសុវត្ថិភាពនៅក្នុងតំបន់វេសបែងឲ្យបាន តាមដែលអាចធ្វើទៅបាន។
«កាតព្វកិច្ចនេះ រួមមានការការពារប៉ាឡេស្ទីនពីការវាយប្រហារពីអ្នកតាំងលំនៅ និងបញ្ចប់ការប្រើប្រាស់កម្លាំងដោយខុសច្បាប់ប្រឆាំងនឹងប៉ាឡេស្ទីនដោយកងកម្លាំងសន្តិសុខអ៊ីស្រាអែល»។
លោកស្រី បានបន្ថែមថា៖« កងកម្លាំងសន្តិសុខអ៊ីស្រាអែល ត្រូវតែបញ្ចប់ជាបន្ទាន់នូវការចូលរួមយ៉ាងសកម្មរបស់ពួកគេ នៅក្នុងនិងការគាំទ្រសម្រាប់ការវាយប្រហារតាំងទីលំនៅលើប្រជាជនប៉ាឡេស្ទីន»។