រដ្ឋមន្ត្រីការបរទេសអាមេរិក លោក Antony Blinken បានទៅដល់មូលដ្ឋានធ្វើសកម្មភាពគាំទ្រកងទ័ពជើងទឹកអាមេរិក នៅទីក្រុង Naples នាថ្ងៃពុធ (ទី១៧ ខែមេសា) ពោលគឺនៅមុនកិច្ចប្រជុំកំពូលរបស់រដ្ឋមន្ត្រីការបរទេសនៃក្រុមប្រទេសមានឧស្សាហកម្មលូតលាស់ទាំង៧ ឬ G7 នៅលើកោះ Capri របស់ប្រទេសអ៊ីតាលី។
លោក Blinken នឹងធ្វើដំណើរទៅកាន់កោះ Capri នៅយប់ថ្ងៃពុធនេះ ជាមួយភរិយារបស់លោក គឺលោកស្រី Evan Ryan។ កិច្ចប្រជុំនេះនឹងនាំឲ្យមានការជួបជុំគ្នានៃរដ្ឋមន្ត្រីការបរទេសមកពីប្រទេសអ៊ីតាលី កាណាដា បារាំង អាល្លឺម៉ង់ ជប៉ុន ចក្រភពអង់គ្លេស សហរដ្ឋអាមេរិក និងសហភាពអឺរ៉ុប ដើម្បីពិភាក្សាអំពីបញ្ហានយោបាយ និងសេដ្ឋកិច្ច។
បញ្ហាមួយចំនួនដែលគេរំពឹងថា នឹងត្រូវបានលើកយកមកពិភាក្សានៅក្នុងកិច្ចប្រជុំ G7 នេះ គឺការឆ្លើយតបទៅនឹងការវាយប្រហាររបស់អ៊ីរ៉ង់ទៅលើអ៊ីស្រាអែល និងការព្រួយបារម្ភអំពីប្រទេសចិនដែលជួយរុស្ស៊ីកសាងកម្លាំងយោធារបស់ខ្លួន។
នៅថ្ងៃពុធនេះ ម្ចាស់ផ្ទះអ៊ីតាលី បានរៀបចំវិធានការសន្តិសុខយ៉ាងតឹងរ៉ឹង នៅលើកោះ Capri ដើម្បីការពារសុវត្ថិភាពជំនួបកំពូលដែលមានរយៈពេល ៣ថ្ងៃនេះ។ នគរបាលចំនួន ១.៤០០នាក់ ត្រូវបានដាក់ពង្រាយនៅលើកោះនេះ ដោយមានការចូលរួមពីអ្នកមុជទឹក សុនខហិតក្លិន អ្នកបាញ់កាំភ្លើងស៊ីប និងក្រុមកម្ចាត់ការបំផ្ទុះគ្រាប់បែក៕