ខណៈពិធីបុណ្យចូលឆ្នាំថ្មីប្រពៃណីជាតិខ្មែរ បានបញ្ចប់ដោយភាពសប្បាយរីករាយនៅទូទាំងប្រទេសកម្ពុជា។ នៅព្រឹកថ្ងៃទី១៨ ខែមេសានេះ បានមើលឃើញថា កម្មករ កម្មការនី បាននាំគ្នាចូលបំពេញការងាររៀងៗខ្លួនឡើងវិញ ជាមួយនឹងទឹកមុខសប្បាយរីករាយគ្រប់ៗគ្នា។
លោក ប៊ី ចាន់រ៉ានី ប្រធានរដ្ឋបាលរោងចក្រកាត់ដេរសម្លៀកបំពាក់ ស៊ីជី ក្លូរី ស្ថិតនៅតំបន់ទ្រុងមាន់ ខណ្ឌមានជ័យ រាជធានីភ្នំពេញ បានឲ្យទូរទស្សន៍ព័ត៌មាន ប៊ីធីវី ដឹងថា គិតត្រឹមព្រឹកថ្ងៃនេះ មានកម្មករនិយោជិតបានចូលកន្លែងការងារវិញចំនួនប្រមាណ ៨០% ខណៈមួយចំនួនផ្សេងទៀតកំពុងធ្វើដំណើរតាមផ្លូវ និងមួយចំនួនផ្សេងទៀតដាក់ច្បាប់ដោយសារមានធុរៈបន្ទាន់។ លោក បានឲ្យដឹងថា សម្រាប់រោងចក្រ ស៊ីជី ក្លូរីនេះ ថៅកែអនុញ្ញាតឲ្យកម្មករនិយោជិតឈប់សម្រាកដោយមានប្រាក់ឈ្នួលរយៈពេល ៧ថ្ងៃ នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរនេះ ដើម្បីបានជួបជុំគ្រួសារនៅស្រុកកំណើតរៀងៗខ្លួន។
កំពុងធ្វើដំណើរចូលទៅក្នុងរោងចក្រ កម្មករ កម្មការិនី បានឲ្យព័ត៌មាន ប៊ីធីវី ដឹងថា បន្ទាប់ពីឈប់សម្រាកអស់រយៈពេលជាច្រើនថ្ងៃកន្លងមកនេះ បានបន្សល់ទុកនូវអនុស្សាវរីយ៍ជាច្រើនពីការជួបជុំ រវាងក្រុមគ្រួសារ សាច់ញាតិ និងមិត្តភ័ក្តិ។ ពួកគាត់បានឲ្យដឹងទៀតថា ជារៀងរាល់ឆ្នាំក្នុងពិធីបុណ្យចូលឆ្នាំ ក្រៅពីការជួបជុំក្រុមគ្រួសារនៅតាមផ្ទះ ក៏បាននាំគ្នាធ្វើចង្ហាន់ និងរៀបចំទេយ្យទានផ្សេងៗប្រគេនព្រះសង្ឃនៅតាមទីវត្តអារាមនានា ដើម្បីឧទ្ទិស មគ្គផល និងគុណូប្បការៈគុណទៅដល់អ្នកមានគុណ និងជីដូនជីតាដែលបានចែកឋានទៅកាន់បរលោក។
យ៉ាងណាក៏ដោយ កម្មករ កម្មការិនីខាងលើនេះ បានលើកឡើងស្រដៀងគ្នាទៀតថា អ្វីដែលធ្វើឲ្យពួកគាត់កាន់តែរីករាយថែមទៀតនោះ គឺអាចវិលត្រឡប់ និងចូលបំពេញការងារបានជាធម្មតាឡើងវិញ និងសង្ឃឹមថា នឹងមានការងារកាន់តែច្រើនថែមទៀត និងមានការងារថែមម៉ោងដើម្បីទទួលបានចំណូលខ្ពស់។
សូមបញ្ជាក់ថា ជារៀងរាល់ឆ្នាំ ក្នុងអំឡុងបុណ្យទានធំៗ ក៏ដូចជាពិធីបុណ្យចូលឆ្នាំខ្មែរ ប្រជាពលរដ្ឋភាគច្រើនតែងតែចាកចេញពីរាជធានីភ្នំពេញទៅជួបជុំក្រុមគ្រួសារនៅស្រុកកំណើត និងខ្លះទៀតដើរលេងកម្សាន្តទាំងក្នុងនិងក្រៅប្រទេស។ សម្រាប់ឆ្នាំ២០២៤នេះ ប្រមុខរដ្ឋាភិបាលបានប្រកាសអនុញ្ញាតឱ្យកម្មករនិយោជិតទាំងអស់សម្រាកដោយទទួលបានប្រាក់ឈ្នួលរយៈពេល ៤ថ្ងៃ ចាប់ពីថ្ងៃ១៣, ១៤, ១៥ និងថ្ងៃទី១៦ ខែមេសា ឆ្នាំ២០២៤៕ អត្ថបទ៖ ឈិត បូរ៉ាវី