កងពលតូចដឹកជញ្ជូនលេខ៩៩ បានប្រកាសត្រៀមកម្លាំង និងសម្ភារគ្រប់ពេលវេលាទាំងអស់​សម្រាប់ចុះជួយអន្តរាគមន៍ ដល់បងប្អូនប្រជាពលរដ្ឋដែលជួបបញ្ហាគ្រោះមហន្តរាយនានា​ដែល​កើតឡើងជាយថាហេតុណាមួយនោះ។

ថ្លែងប្រាប់ទូរទស្សន៍ BTV តាមរយៈតេលេក្រាម នាថ្ងៃទី១៨ ខែមេសា ឆ្នាំ២០២៤នេះ លោក ឧត្តមសេនីយ៍ត្រី ហ៊ុល វណ្ឌី មេបញ្ជាការរង និងជានាយសេនាធិការកងពលតូចដឹកជញ្ជូនលេខ៩៩ បានឲ្យដឹងថា បច្ចុប្បន្ននេះ កងកម្លាំងរបស់កងពលតូចលេខ៩៩ បានកំពុងត្រៀមខ្លួន២៤ម៉ោង​លើ២៤ម៉ោង ដើម្បីរង់ចាំបទបញ្ជា និងផែនការរបស់ឧត្តមសេនីយ៍ឯក ម៉ឹង ពន្លក អគ្គនាយក នាយកដ្ឋានភស្តុភារ ហិរញ្ញវត្ថុ នៃក្រសួងការពារជាតិ ក៏ដូចជាថ្នាក់ដឹកនាំក្រសួងការពារជាតិ ដើម្បីចុះជួយអន្តរាគមន៍តាមគោលដៅ ដែលបងប្អូនប្រជាពលរដ្ឋជួបបញ្ហា និងតាមតម្រូវការ​ផ្សេងៗជាដើម។

លោកឧត្តមសេនីយ៍ត្រី ហ៊ុល វណ្ឌី បានឲ្យដឹងទៀតថា កងពលរបស់លោក បានរៀបចំគ្រប់ មធ្យោបាយ​ដឹកជញ្ជូនជាច្រើន ក្នុងនោះរថយន្តដុងហ្វេង ចំនួន៦០គ្រឿង រថយន្តជុសជុលចល័ត២ គ្រឿង រថយន្តជីអឹមស៊ី(ស្ទួច)១គ្រឿង ទូកម៉ាស៊ីន(អូប័រ)ចំនួន១១គ្រឿង ម៉ាស៊ីនបូមទឹកខ្នាតតូចចំនួន ៣០គ្រឿង ​ម៉ាស៊ីនកាត់ដែក ​ឬថ្មចំនួន៥គ្រឿង ម៉ាស៊ីនភ្លើង២គ្រឿង ស៊ីទែនទឹកខ្នាតធំ​និងតូចចំនួន ១០០ស៊ីទែន ​និងកម្លាំងបើកបរ និងសង្រ្គោះជាង ២០០នាក់ ក្នុងនោះ មានពេទ្យចំនួន១៥នាក់ ផងដែរ។

លោកឧត្តមសេនីយ៍ត្រី ហ៊ុល វណ្ឌី បានអះអាងថា កងកម្លាំងយោធានៃកងពលតូចដឹកជញ្ជូន​លេខ៩៩ គ្មានការរុញរានោះឡើយក្នុងការអន្តរាគមន៍ជួយសង្រ្គោះ​ប្រជាជនពេលជួបបញ្ហា មិនថាយប់ ឬថ្ងៃនោះទេ ជាក់ស្តែងដូចសកម្មភាពអ្វីដែល​ក្រុមការងាររបស់​លោកបានធ្វើ​នា​ពេលកន្លងមក​យ៉ាងដូច្នេះដែរ​ ដោយការចុះជួយពល រដ្ឋរងគ្រោះនេះអស់ពីកម្លាំងកាយចិត្តគ្មាន​ការអល់អែកនោះឡើយ ​ពោល មានបទបញ្ជាស្មើណាកម្លាំងនៃកងពលនឹងចេញស្មើនោះតែម្តង។

ជាមួយគ្នានោះដែរ ​លោកឧត្តមសេនីយ៍ត្រី ហ៊ុល វណ្ឌី ក៏បានលើកឡើងផងដែរថា ស្របតាម​កំណែ​ទម្រង់របស់រាជរដ្ឋាភិបាល ​ក៏ដូចជាក្រសួងការពារជាតិ​ កម្លាំងនៃកងពលតូចដឹកជញ្ជូនលេខ៩៩ ក៏បានធ្វើការ​ហ្វឹកហាត់ ​និងធ្វើសមយុទ្ធជាប្រចាំជាមួយភាគីដទៃទៀត ​លើជំនាញសង្រ្គោះបន្ទាន់ ដើម្បី​ជួយ​ដល់បងប្អូនប្រជាពលរដ្ឋឲ្យបានទាន់ពេលវេលា​ពេលដែលជួបគ្រោះធម្មជាតិ ដូចជា​ករណី​ខ្យល់កន្រ្តាក់ គ្រោះរាំងស្ងួត​ និងទឹកជំនន់ជាដើម៕អត្ថបទ៖​ បាន ចក់