ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ទទួលបានគ្រឿងឥស្សរិយយសថ្នាក់មិត្តភាពពីប្រធានាធិបតីរុស្ស៊ី វ៉្លាឌីមៀរ ពូទីន សម្រាប់ការចូលរួមចំណែកដ៏សំខាន់ក្នុងការពង្រឹងមិត្តភាពរវាងប្រទេសទាំងពីរ។
ការផ្ដល់គ្រឿងឥស្សរិយសមកដល់ប្រមុខរាជរដ្ឋាភិបាលកម្ពុជានេះ ត្រូវបានប្រកាសឱ្យដឹងដោយស្ថានទូតរុស្ស៊ីប្រចាំនៅកម្ពុជានៅល្ងាចថ្ងៃនេះ។
បើតាមសេចក្ដីប្រកាសព័ត៌មានរបស់ស្ថានទូតរុស្ស៊ី ប្រធានាធិបតីរុស្ស៊ី លោក វ៉្លាឌីមៀរ ពូទីន បានសម្រេចបំពាក់គ្រឿងឥស្សរិយសថ្នាក់មិត្តភាពនេះមកដល់សម្ដេចតេជោ ហ៊ុន សែន កាលពីថ្ងៃម្សិលមិញនេះ។
ស្ថានទូតរុស្ស៊ីប្រចាំរាជធានីភ្នំពេញ បញ្ជាក់ថា មេដឹកនាំរុស្ស៊ីបានបំពាក់គ្រឿងឥស្សរិយសថ្នាក់មិត្តភាពនេះមកដល់សម្ដេចតេជោ ហ៊ុន សែន សម្រាប់ការចូលរួមចំណែកដ៏សំខាន់របស់សម្ដេចនៅក្នុងការពង្រឹងមិត្តភាពរវាងប្រជាជនរុស្ស៊ី និងកម្ពុជា។
គិតត្រឹមថ្ងៃទី១៣ ខែឧសភាកន្លងមកនេះ កម្ពុជា និងរុស្ស៊ី បានបង្កើតចំណងការទូតនឹងគ្នាអស់រយៈពេល ៦៥ឆ្នាំហើយចាប់តាំងពីឆ្នាំ១៩៥៦មក៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
