អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គណៈកម្មការរាជធានី-ខេត្តរៀបចំការបោះឆ្នោតនឹងចាប់ផ្តើមបិទផ្សាយបញ្ជីបោះឆ្នោតដំបូង សម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង ស្រុក និងខណ្ឌនាថ្ងៃទី២០ ខែមេសាខាងមុខ។
ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV ឱ្យដឹងនៅថ្ងៃទី១៨ ខែមេសា ឆ្នាំ២០២៤ថា ដើម្បីឆ្ពោះទៅរកការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ដែលនៅសល់រយៈពេលជិត១ខែទៀតប៉ុណ្ណោះ គ.ជ.ប កំពុងឈានដល់ដំណាក់កាលរៀបចំបញ្ជីបោះឆ្នោតដំបូង និងការបិទផ្សាយបញ្ជីបោះឆ្នោតទៅតាមគណៈកម្មការរាជធានី-ខេត្តរៀបចំការបោះឆ្នោតនីមួយៗ។ ឯកឧត្តម បន្តថា ការរៀបចំបញ្ជីបោះឆ្នោតដំបូង គឺជាការធ្វើបច្ចុប្បន្នភាពនៃសមាជិកក្រុមប្រឹក្សាឃុំ-សង្កាត់ ដែលមានចំនួនជាង១ម៉ឺននាក់ ហើយដើម្បីធានាថាបញ្ជីបោះឆ្នោតដំបូងមានភាពត្រឹមត្រូវ និងអាចប្រើប្រាស់សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌនាពេលខាងមុខ។
ជាមួយគ្នា អ្នកនាំពាក្យ គ.ជ.ប បញ្ជាក់ថា គណៈកម្មការរាជធានី-ខេត្តរៀបចំការបោះឆ្នោតនៅទូទាំងប្រទេស នឹងចាប់ផ្តើមបិទផ្សាយបញ្ជីបោះឆ្នោតដំបូងនាថ្ងៃទី២០ ខែមេសាខាងមុខ ដើម្បីឱ្យអង្គបោះឆ្នោតបានពិនិត្យផ្ទៀងផ្ទាត់លើទិន្នន័យរបស់ខ្លួន។ ក្នុងនោះ ប្រសិនពិនិត្យឃើញមានភាពមិនប្រក្រតីអង្គបោះឆ្នោតអាចប្តឹងតវ៉ា ឬជំទាស់លើបញ្ជីបោះឆ្នោតដំបូង។
អ្នកនាំពាក្យរូបនេះ បានឱ្យដឹងទៀតថា អង្គបោះឆ្នោតមានសិទ្ធិប្តឹងតវ៉ា ឬជំទាស់ ក្នុងរយៈពេល៨ថ្ងៃ ចាប់ពីថ្ងៃបិទផ្សាយបញ្ជីបោះឆ្នោតដំបូង ពីថ្ងៃទី២១ ដល់ថ្ងៃទី២៨ ខែមេសា ឆ្នាំ២០២៤។ ក្នុងករណីការប្តឹងតវ៉ា ឬជំទាស់មិនអាចទទួលយកបាន អង្គបោះឆ្នោតមានសិទ្ធិប្តឹងបន្តមកកាន់គណៈកម្មាធិការជាតិរៀបចំការបោះឆ្នោត។
អ្នកនាំពាក្យរូបនេះ បន្ថែមថា បន្ទាប់ពីការរៀបចំបញ្ជីបោះឆ្នោតដំបូង និងការបិទផ្សាយបញ្ជីបោះឆ្នោតបញ្ចប់ទៅដោយរលូន គ.ជ.ប នឹងឈានដល់ដំណាក់ត្រៀមសម្រាប់គណបក្សនយោបាយចាប់ផ្តើមការឃោសនាបោះឆ្នោតនាដើមខែឧសភាខាងមុខនេះ។
សូមជម្រាបថា គ.ជ.ប បានប្រកាសទទួលស្គាល់ជាផ្លូវការចំពោះគណបក្សនយោបាយចំនួន៥ ឱ្យចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ឆ្នាំ២០២៤ ក្នុងនោះ រួមមាន៖ គណបក្សប្រជាជនកម្ពុជា, គណបក្សឆន្ទះខ្មែរ ,គណបក្សកម្លាំងជាតិ, គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ដោយការបោះឆ្នោតនេះនឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤៕ អត្ថបទ សេក ឧត្តម