រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយនៅថ្ងៃព្រហស្បតិ៍នេះ បន្ទាប់ពីកិច្ចប្រជុំជាមួយសមភាគីឥណ្ឌូនេស៊ី លោកស្រី Retno Marsudi នៅទីក្រុងហ្សាការតាថា ប្រទេសចិន និងឥណ្ឌូនេស៊ី បានសន្យាពង្រឹងទំនាក់ទំនងសេដ្ឋកិច្ច និងរក្សាសន្តិភាព និងស្ថិរភាព ក្នុងតំបន់។
លោកវ៉ាង ក៏បានអំពាវនាវឲ្យភាគីទាំងអស់នៅក្នុងជម្លោះហ្កាហ្សា អនុវត្តការអត់ធ្មត់ ហើយបាននិយាយថា សហរដ្ឋអាមេរិក គួរតែគាំទ្រសេចក្តីសម្រេចរបស់អង្គការសហប្រជាជាតិសម្រាប់បទឈប់បាញ់ នៅក្នុងតំបន់ហ្កាហ្សា។
លោកបាននិយាយនៅក្នុងការអត្ថាធិប្បាយដែលត្រូវបានបកប្រែជាភាសាឥណ្ឌូនេស៊ី បន្ទាប់ពីកិច្ចប្រជុំថា រដ្ឋមន្ត្រីទាំងពីរ បានសម្តែងការមិនសប្បាយចិត្តចំពោះគ្រោះមហន្តរាយមនុស្សធម៌ ដោយសារតែជម្លោះប៉ាឡេស្ទីន-អ៊ីស្រាអែល។ យើងយល់ស្របថា សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិស្តីពីបទឈប់បាញ់ ត្រូវតែត្រូវបានអនុវត្តយ៉ាងពេញលេញ និងដោយគ្មានលក្ខខណ្ឌណាមួយឡើយ»។
លោកវ៉ាង បានជំរុញឲ្យសហរដ្ឋអាមេរិក «ស្តាប់សហគមន៍អន្តរជាតិ» ចំពេលមានការព្រួយបារម្ភអំពីជម្លោះដែលកំពុងកើនឡើង នៅមជ្ឈិមបូព៌ា។
លោកបានលើកឡើងថា៖«ក្រុមប្រឹក្សាសន្តិសុខអង្គការសហប្រជាជាតិ គឺជាយន្តការសន្តិសុខសមូហភាព ដែលមិនត្រូវប្រើប្រាស់ដោយប្រទេសជាក់លាក់ណាមួយឡើយ»។
រដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បាននិយាយថា លោកស្រីសង្ឃឹមថា ប្រទេសចិននឹង «ប្រើប្រាស់ឥទ្ធិពលរបស់ខ្លួន ដើម្បីទប់ស្កាត់ការកើនឡើងភាពតានតឹង នៅក្នុងតំបន់ហ្កាហ្សា ដោយសង្កត់ធ្ងន់លើតម្រូវការសម្រាប់ដំណោះស្រាយរដ្ឋពីរ។