ស្វាយរៀង ៖ ផ្លូវក្រាលកៅស៊ូ DBST ចំនួន ១ ខ្សែ ស្ថិតក្នុងខេត្តស្វាយរៀង និងស្ពានបេតុងចំនួន ១ ស្ថិតនៅខេត្តកំពង់ឆ្នាំង ត្រូវបានគណៈកម្មា ធិការលទ្ធកម្ម ឯកភាពទទួលយកលទ្ធផលនៃការអនុវត្តការងាររបស់នាយកដ្ឋានផ្លូវលំជនបទ បញ្ចប់សុពលភាពការងារដោយគុណភាព និងសោភ័ណភាព នៅរក្សាគុណភាពបានល្អ សម្រាប់ការធ្វើដំណើរនៃសាធារជនទូទៅ។

​ឯកឧត្តម ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម (គ.ល) នៅថ្ងៃទី ១៨ ខែ មេសា ឆ្នាំ ២០២៤ នេះ បានដឹកនាំប្រតិភូចុះពិនិត្យ វាយតម្លៃបញ្ចប់ជាស្ថាពររយៈពេលធានាសុពលភាពគុណភាពការងារ ស្ថាបនាស្ពាន និងផ្លូវក្រាលកៅស៊ូ DBST នៅក្នុងខេត្តចំនួនពីរ ក្នុងនោះនៅខេត្តកំពុងឆ្នាំង បានចុះត្រួតពិនិត្យជាក់ស្តែង លើការងារស្ថាបនា ស្ពានបេតុង ចំនួន ១កន្លែង ប្រវែង ៣០ ម៉ែត្រ ទទឹង ៨ ម៉ែត្រ និងស្ថាបនាផ្លូវក្រាលដីល្បាយក្រួសសងខាងក្បាលស្ពានប្រវែងសរុប ២០០ ម៉ែត្រ ទទឹង ៨ ម៉ែត្រ ស្ថិតនៅភូមិតាមល់លើ ឃុំកោះថ្កូវ ស្រុកជលគីរី ខេត្តកំពង់ឆ្នាំង។

នៅក្នុងថ្ងៃដដែលនេះដែរ, ឯកឧត្តម បានបន្តដឹកនាំប្រតិភូចុះត្រួតពិនិត្យ វាយតម្លៃបញ្ចប់ជាស្ថាពររយៈពេលធានា សុពលភាព គុណភាព ការងារស្ថាបនា ផ្លូវក្រាលកៅស៊ូ DBST ចំនួន ០១ខ្សែ ប្រវែង ៣ ៧០០ ម៉ែត្រ ទទឹង ៧ ម៉ែត្រ និងចិញ្ចើមផ្លូវសង ខាងក្រាលដីល្បាយក្រួសទទឹងម្ខាងៗ ១ម៉ែត្រ ស្ថិតនៅភូមិស្រម៉ ទៅភូមិវាល ឃុំបុសមន ស្រុករំដួល ខេត្តស្វាយរៀង, ចំពោះផ្លូវនិងស្ពាន ខាងលើនេះ ទទួលការអនុវត្តដោយនាយកដ្ឋានផ្លូវលំជនបទ នៃក្រសួងអភិវឌ្ឍន៍ជនបទ។

ជុំវិញស្ពាននិងផ្លូវខាងលើនេះដែរ, ឯកឧត្តម ផូ ផារិទ្ធ បានឯកភាព និងវាយតម្លៃខ្ពស់ ចំពោះការខិតខំប្រឹងប្រែង អនុវត្តទៅតាមផែនការ ស្របតាមបទដ្ឋានបច្ចេកទេសបានត្រឹមត្រូវ, ព្រោះផ្លូវនិងស្ពានមានសារៈសំខាន់ណាស់ សម្រាប់ការធ្វើដំណើររបស់ប្រជាពលរដ្ឋ មិនថា ប្រជាពលរដ្ឋនៅមូលដ្ឋាន ឬប្រជាពលរដ្ឋធ្វើដំណើរឆ្លងកាត់នោះឡើយ ជាពិសេសការផ្តល់អត្ថប្រយោជន៍ក្នុងការដឹកជញ្ជូនកសិផលរបស់ កសិករនៅតំបន់នោះ ការធ្វើដំណើររបស់សិស្សានុសិស្សទៅរៀនសូត្រ ការដឹកអ្នកជម្ងឺមកកាន់មណ្ឌលសុខភាពជាដើម។ ទាក់ទិនគម្រោង នេះដែរ, ឯកឧត្តម បានសំណូមពរអាជ្ញាធរមូលដ្ឋានភូមិ-ឃុំ សហការណែនាំឱ្យប្រជាពលរដ្ឋចូលរួមក្នុងការថែទាំផ្លូវនិងស្ពាន ដោយមាន ការយាមកាមឲ្យបានហ្មត់ចត់ ដើម្បីរក្សាគុណភាពផ្លូវ និងស្ពានឲ្យបានគង់វង្សយូរអង្វែង និងត្រូវចាត់ទុកផ្លូវនិងស្ពានជារបស់ពួកគាត់ ទាំង អស់គ្នា៕

អត្ថបទ៖ សុន រ៉ាឌី