ប្រធានាធិបតីប៉ូឡូញ លោក Andrzej Duda បាននិយាយថា លោកបានជួបជាលក្ខណៈឯកជនជាមួយអតីតប្រធានាធិបតីសហរដ្ឋអាមេរិក និងបេក្ខជនប្រធានាធិបតីរបស់គណបក្សសាធារណរដ្ឋ លោក Donald Trump អំឡុងដំណើរទស្សនកិច្ចរបស់លោកទៅកាន់ទីក្រុង New York កាលពីថ្ងៃពុធ (ទី១៧ ខែមេសា)។
ក្រុមរបស់លោក Trump ដែលបានពណ៌នាពីបុគ្គលទាំង២ ថាជា «មិត្តនឹងគ្នាដ៏អស្ចារ្យ» បាននិយាយនៅក្នុងសេចក្ដីប្រកាសព័ត៌មានពីកិច្ចប្រជុំនេះថា ពួកគេបានពិភាក្សាលើសំណើរបស់លោក Duda ដែលថា ប្រទេសសមាជិករបស់អង្គការណាតូ (NATO) ចំណាយយ៉ាងហោចណាស់ ៣ភាគរយនៃផលិតផលក្នុងស្រុកសរុប (GDP) របស់ពួកគេលើវិស័យការពារជាតិ។
លោក Duda ដែលអាណត្តិរបស់លោក នឹងផុតនៅឆ្នាំ២០២៥ គឺជាដៃគូអន្តរជាតិលេខ១ របស់លោក Trump អំឡុងពេលលោកកាន់តំណែងជាប្រធានាធិបតី។ លោក Duda បានប្រាប់អ្នកសារព័ត៌មាននៅទីក្រុងញូវយ៉កថា៖ «ខ្ញុំត្រូវបានលោក Donald Trump អញ្ជើញឲ្យទៅលេងផ្ទះល្វែងឯកជនរបស់លោក ដូច្នេះ អាចនិយាយបានថា នេះគ្រាន់តែជាការជួបប្រជុំឯកជន ទាក់ទងនឹងវត្តមានរបស់ខ្ញុំ នៅទីនេះ ក្នុងទីក្រុងញូវយ៉ក»។
គួរបញ្ជាក់ដែរថា លោក Trump ដែលកំពុងត្រូវបានកាត់ទោសនៅទីក្រុងញូវយ៉ក ជុំវិញការចោទប្រកាន់ថា លោកបានបិទបាំងការផ្ដល់ «ប្រាក់បំបិទមាត់» ដល់តារាសម្ដែងភាពយន្តអាសអាភាស នាង Stormy Daniels កំពុងស្ថិតក្នុងការប្រជែងយ៉ាងតឹងតែងទល់នឹងប្រធានាធិបតីលោក Joe Biden ដែលជាសមាជិកគណបក្សប្រជាធិបតេយ្យ នៅមុនការបោះឆ្នោតប្រធានាធិបតីខែវិច្ឆិកា៕